ഐസ്വാള്‍: കന്നി ഐ ലീഗ് കിരീടം നേടാനുള്ള സുവര്‍ണാവസരം കളഞ്ഞുകുളിച്ച് മിനെര്‍വ പഞ്ചാബ്. ഇന്നലെ നടന്ന പോരാട്ടത്തില്‍ ചെന്നൈ സിറ്റിയോട് 2-1ന് പരാജയപ്പെട്ടതോടെയാണ് അവരുടെ കിരീട നേട്ടമെന്ന സ്വപ്നം തുലാസിലായത്. ഇതോടെ മൂന്നാം സ്ഥാനത്തുള്ള ഈസ്റ്റ് ബംഗാളിന് കിരീട പ്രതീക്ഷ സജീവമാക്കാന്‍ അവസരമൊരുങ്ങി. ഈസ്റ്റ് ബംഗാളിന് രണ്ട് മത്സരങ്ങള്‍ അവശേഷിക്കുമ്പോള്‍ മിനെര്‍വയ്ക്ക് ഒരു മത്സരമാണ് ബാക്കി. ഈ മത്സരത്തില്‍ മിനെര്‍വ വിജയിച്ചാല്‍ അവര്‍ക്ക് 35 പോയിന്റുകളാകും. ഇനിയുള്ള രണ്ട് മത്സരങ്ങള്‍ ഈസ്റ്റ് ബംഗാള്‍ വിജയിച്ചാല്‍ അവര്‍ക്കും 35 പോയിന്റാകും. നേര്‍ക്കുനേര്‍ പോരാട്ടമാണ് രണ്ട് ടീമുകള്‍ തുല്ല്യതയില്‍ വന്നാല്‍ കിരീട നേട്ടത്തിനായി പരിഗണിക്കുന്നത്. രണ്ട് തവണ ഏറ്റുമുട്ടിയപ്പോള്‍ ഒന്നില്‍ ഈസ്റ്റ് ബംഗാള്‍ വിജയിച്ചപ്പോള്‍ ഒരു മത്സരം സമനില. അടുത്ത രണ്ട് മത്സരങ്ങള്‍ ഈസ്റ്റ് ബംഗാള്‍ തോല്‍ക്കുകയും അടുത്ത മത്സരം മിനെര്‍വ ജയിക്കുകയും ചെയ്താല്‍ അവര്‍ക്ക് കിരീടം ഉറപ്പിക്കാം. ഈസ്റ്റ് ബംഗാള്‍ ഒരു മത്സരം തോറ്റാലും മിനെര്‍വയ്ക്ക് അവസരമുണ്ട്.
മറ്റൊരു മത്സരത്തില്‍ ഗോകുലം കേരള എഫ്.സിയുടെ അപരാജിത കുതിപ്പ് ഐസ്വാള്‍ അവസാനിപ്പിച്ചു. ഐസ്വാളിന്റെ തട്ടകത്തില്‍ നടന്ന പോരാട്ടത്തില്‍ ഒന്നിനെതിരേ മൂന്ന് ഗോളുകള്‍ക്കാണ് ഗോകുലം തോല്‍വി വഴങ്ങിയത്. തോല്‍വി കേരള ടീമിന്റെ സൂപ്പര്‍ കപ്പ് മോഹങ്ങള്‍ക്കും വിലങ്ങിടുന്നതായി. ഇനി പ്ലേയോഫടക്കമുള്ള സാധ്യതകള്‍ തേടേണ്ട അവസ്ഥയിലാണ് ഗോകുലം.