ലണ്ടന്‍: അഞ്ച് ദിവസത്തിനിടെ ആഴ്‌സണലിനെ രണ്ടാം വട്ടവും തോല്‍പ്പിച്ച് മാഞ്ചസ്റ്റര്‍ സിറ്റി. ദിവസങ്ങള്‍ക്ക് മുന്‍പ് ലീഗ് കപ്പിന്റെ ഫൈനലില്‍ മറുപടിയില്ലാത്ത മൂന്ന് ഗോളുകള്‍ക്ക് ഗണ്ണേഴ്‌സിനെ വീഴ്ത്തി കിരീടത്തില്‍ മുത്തമിട്ട സിറ്റി ഇത്തവണ പ്രീമിയര്‍ ലീഗ് പോരാട്ടത്തിനായി ആഴ്‌സണലിന്റെ തട്ടകമായ എമിറേറ്റ്‌സ് സ്റ്റേഡിയത്തില്‍ ഇറങ്ങി 3-0ത്തിന് തന്നെ വിജയം പിടിച്ചു. ഒപ്പം ഇംഗ്ലീഷ് പ്രീമിയര്‍ ലീഗ് കിരീടത്തിന് തൊട്ടടുത്തെത്താനും സിറ്റിക്കായി. പരിശീലക കുപ്പായത്തില്‍ സിറ്റിക്ക് വേണ്ടി നൂറാം മത്സരത്തിനിറങ്ങിയ കോച്ച് പെപ് ഗെര്‍ഡിയോളയ്ക്ക് അവിസ്മരണീയ വിജയമൊരുക്കിയാണ് ടീം ആഴ്‌സണലിന്റെ തട്ടകത്തില്‍ നിന്ന് തിരിച്ചുകയറിയത്. 18 മാസത്തെ ഇംഗ്ലീഷ് ഫുട്‌ബോള്‍ കാലത്തെ ആദ്യ ട്രോഫിയാണ് ഗെര്‍ഡിയോള കഴിഞ്ഞ ദിവസം നേടിയ ലീഗ് കപ്പ്.
മികച്ച രീതിയില്‍ തന്നെയാണ് സ്വന്തം തട്ടകത്തില്‍ പീരങ്കിപ്പട പോരാട്ടത്തിന് തുടക്കമിട്ടത്. എന്നാല്‍ ആദ്യ പതിനഞ്ച് മിനുട്ടില്‍ അവര്‍ സ്ഥാപിച്ച മുന്‍തൂക്കം മൂന്ന് തുടര്‍ ഗോളുകളുടെ ബലത്തില്‍ മാഞ്ചസ്റ്റര്‍ സിറ്റി മുളയിലേ നുള്ളി കളഞ്ഞു. 15ാം മിനുട്ടില്‍ ബെര്‍ണാര്‍ഡോ സില്‍വ സിറ്റിയെ മുന്നില്‍ കടത്തി.
പിന്നാലെ 28ാം മിനുട്ടില്‍ ഡേവിഡ് സില്‍വയും 33ാം മിനുട്ടില്‍ ലിറോയ് സനയും പട്ടിക തികച്ചു. ആദ്യ പകുതിയില്‍ തന്നെ മൂന്ന് ഗോള്‍ വഴങ്ങേണ്ടി വന്നത് ഗണ്ണേഴ്‌സിന്റെ തിരിച്ചടിക്കാമെന്ന പ്രതീക്ഷകളും കെടുത്തി. 28 കളികളില്‍ നിന്ന് 75 പോയിന്റുമായി മാഞ്ചസ്റ്റര്‍ സിറ്റി കിരീടത്തിലേക്ക് കുതിക്കുന്നു.