കൊച്ചി: പശ്ചിമഘട്ടത്തിനു വേണ്ടിയുള്ള പോരാട്ടം ഇനി ഗുജറാത്തില്‍ കേന്ദ്രീകരിക്കുമെന്ന് പരിസ്ഥിതി പ്രവര്‍ത്തക മേധാ പട്കര്‍.
പശ്ചിമഘട്ട സംരക്ഷണ യാത്രയുടെ 30-ാം വാര്‍ഷികവും ദേശീയ പരിസ്ഥിതി സമ്മേളനത്തിന്റെ അന്തര്‍ദേശീയ പ്രചാരണ പരിപാടിയും എറണാകുളം മഹാരാജാസ് കോളജില്‍ ഉദ്ഘാടനം ചെയ്യുകയായിരുന്നു അവര്‍. പ്രകൃതിയെ വന്‍തോതില്‍ ചൂഷണം ചെയ്യുന്ന പ്രവൃത്തികളാണ് ഗുജറാത്തില്‍ ദിനംപ്രതി അരങ്ങേറുന്നത്. നര്‍മദ നദിയില്‍ കെട്ടിപ്പൊക്കിയ സര്‍ദാര്‍ സരോവര്‍ അണക്കെട്ട് വന്‍ പരിസ്ഥിതി ആഘാതം സൃഷ്ടിക്കുന്നുണ്ട്. പശ്ചിമഘട്ട സംരക്ഷണത്തിന് ആഗോള പ്രസക്തിയുണ്ടെന്നും ചില സംസ്ഥാനങ്ങളില്‍ മാത്രം സമരത്തെ തളച്ചിടരുതെന്നും മേധാ പട്കര്‍ പറഞ്ഞു.
അമേരിക്ക അടക്കമുള്ള രാജ്യങ്ങള്‍ ഡാമുകള്‍ പൊളിച്ച് അവയെ സ്വതന്ത്രമാക്കുമ്പോള്‍ ഇവിടെ വന്‍ ഡാമുകള്‍ കെട്ടിപ്പൊക്കുകയാണ്. പരിസ്ഥിതി സംരക്ഷണത്തിനും കാട് സംരക്ഷണത്തിനുമുള്ള നിയമങ്ങള്‍ കോര്‍പറേറ്റുകള്‍ക്കു വേണ്ടി മാത്രമാകുന്നു. അതിരപ്പിള്ളി പ്രൊജക്ടുമായി മുന്നേട്ടു പോകാതിരിക്കുന്നത് കേരളത്തിന് ഗുണകരമാണ്. അതിരപ്പിള്ളി, പുതുവൈപ്പ് പദ്ധതികള്‍ നടപ്പാക്കാന്‍ അധികാരികള്‍ ശ്രമിക്കരുത്. പ്രകൃതി സംരക്ഷണത്തിനായി സ്ത്രീകള്‍ കൂടുതല്‍ മുന്നോട്ടു വരണമെന്നും അവര്‍ പറഞ്ഞു.
ഗോവയില്‍ നിന്നുള്ള പരിസ്ഥിതി പ്രവര്‍ത്തകന്‍ ക്ലോഡ് അല്‍വാരിസ് മുഖ്യപ്രഭാഷണം നടത്തി. 1987ലെ പശ്ചിമഘട്ട രക്ഷാ യാത്രയില്‍ അണിനിരന്നവരെ ചടങ്ങില്‍ ആദരിച്ചു.
അതിരപ്പിള്ളി സമരപ്രവര്‍ത്തക ഗീത വാഴച്ചാല്‍, പരിസ്ഥിതി ശാസ്ത്രജ്ഞയായിരുന്ന ഡോ. ലത അനുസ്മരണം നടത്തി. വിവിധ വിഷയങ്ങളില്‍ നടന്ന സെമിനാറില്‍ ക്ലോഡ് അല്‍ വാരിസ്, പാണ്ഡുരംഗ ഹെഡ്‌ഗേ, ഡോ. വൈശാലി പാട്ടീല്‍, കുമാര്‍ കലാനന്ദ്, ഹരീഷ് വാസദേവ്, ഡോ. എസ് ശങ്കര്‍, ഡോ. ജാഫര്‍ പാലോട്, ഡോ. വി.എസ് വിജയന്‍, കെ.എം സലിംകുമാര്‍, സിവിക് ചന്ദ്രന്‍, പ്രൊഫ. കുസുമം ജോസഫ് സംസാരിച്ചു.