ന്യൂഡല്‍ഹി: ത്രിപുരയിലെ പരാജയത്തില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ പരിഹസിച്ച് ബി.ജെ.പി അധ്യക്ഷന്‍ അമിത് ഷാ.  രാഹുലിന്റെ ഇറ്റലി യാത്ര ചൂണ്ടിക്കാട്ടിയാണ് അമിത് ഷായുടെ പരിഹാസം. തെരഞ്ഞെടുപ്പ് ഇറ്റലിയിലും നടക്കുന്നുണ്ടെന്ന് തനിക്ക് വാട്‌സ് ആപ് സന്ദേശം ലഭിച്ചതായി അമിത് ഷാ പറഞ്ഞു.

'ഇറ്റലിയിലും തെരഞ്ഞെടുപ്പ് നടക്കുന്നുണ്ടെന്ന് എനിക്ക് വാട്‌സാപ്പില്‍ ഒരു സന്ദേശം ലഭിച്ചു', ഷാ മാധ്യമപ്രവര്‍ത്തകരോട് പറഞ്ഞു. അല്ലാതെ രാഹുലിന്റെ യാത്രയും ത്രിപുര, മേഘാലയ,നാഗാലാന്‍ഡ് തെരഞ്ഞെടുപ്പ് ഫലം മുന്നില്‍ കണ്ടല്ലെന്നും അദ്ദേഹം പരിഹസിച്ചു.

തന്റെ മുത്തശ്ശിക്ക് 93 തികയുകയാണെന്നും അതിനാല്‍ ഇത്തവണ ഹോളി അവരോടൊപ്പമാണെന്നും രാഹുല്‍ മാര്‍ച്ച് ഒന്നിന് ട്വീറ്റ് ചെയ്തിരുന്നു.

'എന്റെ മുത്തശ്ശിക്ക് 93 വയസ്സാവുന്നു. ലോകത്തെ ഏറ്റവും ദയാലുവായ ആത്മാവിനുടമയാണ് അവര്‍. ഈ ഹോളി ആഴ്ചയില്‍ ഞാന്‍ അവര്‍ക്ക് ഒരു സര്‍പ്രൈസ് സമ്മാനിക്കുകാണ്.അവര്‍ക്ക് ഒരു ആശ്ലേഷം നല്‍കാന്‍ ഇനി കാത്തിരിക്കുക വയ്യ. എല്ലാവര്‍ക്കും ഹോളി ആശംസകള്‍' എന്നായിരുന്നു രാഹുലിന്റെ ട്വീറ്റ്.

തെരഞ്ഞെടുപ്പിലെ തന്ത്രങ്ങളുടെ മാസ്റ്ററാണെന്നു പറഞ്ഞ് കേന്ദ്ര മന്ത്രി ഗിരിരാജ് സിങും രാഹുല്‍ ഗാന്ധിയെ പരിഹസിച്ചു. ഇന്ത്യയില്‍ നിന്ന് എപ്പോള്‍ ഓടണമെന്ന് അദ്ദേഹത്തിനറിയാം എന്ന് പറഞ്ഞു കൊണ്ടാണ് ഗിരിരാജ് സിങ് രാഹുലിനെ പരിഹസിച്ചത്.