അഗര്‍ത്തല: തുടര്‍ച്ചയായ 20 വര്‍ഷത്തെ ഭരണത്തിന് ശേഷം ത്രിപുര മുഖ്യമന്ത്രി മണിക് സര്‍ക്കാര്‍ രാജിവച്ചു. ഇന്നലെ ഉച്ചയ്ക്ക് ശേഷം ഗവര്‍ണര്‍ ടാതഗട റോയിക്ക് മണിക് സര്‍ക്കാര്‍ രാജിക്കത്ത് കൈമാറി. പുതിയ സര്‍ക്കാര്‍ ചുമതലയേല്‍ക്കും വരെ തല്‍സ്ഥാനത്ത് തുടരാന്‍ ഗവര്‍ണര്‍ അദ്ദേഹത്തോട് ആവശ്യപ്പെട്ടു.
1998 മുതല്‍ ത്രിപുരയിലെ മുഖ്യമന്ത്രിയായിരുന്ന മണിക് സര്‍ക്കാര്‍. പുതിയ സര്‍ക്കാര്‍ വന്നാലും താന്‍ ത്രിപുരയിലുണ്ടാവുമെന്ന് മണിക് സര്‍ക്കാര്‍ മാധ്യമങ്ങളോട് പറഞ്ഞു. തന്റെ പ്രവര്‍ത്തനം താഴെ തട്ടിലുള്ളവര്‍ക്ക് വേണ്ടിയായിരിക്കും. സംസ്ഥാനത്തെ ജനങ്ങള്‍ക്ക് സ്വന്തം കാലില്‍ നില്‍ക്കാനുള്ള എല്ലാവിധ പിന്തുണയും നല്‍കും. ജനങ്ങളുടെ പ്രശ്‌നങ്ങള്‍ ഇനിയും ഉന്നയിക്കുമെന്നും മണിക് സര്‍ക്കാര്‍ പറഞ്ഞു.
വോട്ടിങ് യന്ത്രത്തിലെ കൃത്രിമത്തെ സംബന്ധിച്ചുള്ള ചോദ്യങ്ങള്‍ക്ക് പ്രതികരിക്കാന്‍ താല്‍പര്യമില്ലെന്ന് അദ്ദേഹം അറിയിച്ചു. എന്നാല്‍ പണമുപയോഗിച്ച് ബി.ജെ.പി ജനങ്ങളെ സ്വാധീനിച്ചെന്നും കായിക ശക്തി ഉപയോഗിച്ചാണ് തെരഞ്ഞെടുപ്പില്‍ വിജയിച്ചതെന്നും മണിക് സര്‍ക്കാര്‍ വ്യക്തമാക്കി.
തെരഞ്ഞെടുപ്പില്‍ മൂന്നില്‍ രണ്ട് ഭൂരിപക്ഷം നേടിയാണ് ബി.ജെ.പി-പീപ്പിള്‍ ഫ്രണ്ട് ഓഫ് ത്രിപുര(ഐ.പി.എഫ്.ടി) സംഖ്യം ത്രിപുരയില്‍ വിജയം നേടിയത്. തെരഞ്ഞെടുപ്പ് നടന്ന 59 സീറ്റുകളില്‍ ബി.ജെ.പി 35ഉം എട്ട് സീറ്റുകള്‍ ഐ.പി.എഫ്.ടിയും നേടി. സി.പി.എം 16 സീറ്റുകളിലൊതുങ്ങിയപ്പോള്‍ കോണ്‍ഗ്രസിന് ഒറ്റ സീറ്റും ലഭിച്ചില്ല.