മിലാന്‍: ഇറ്റാലിയന്‍ ദേശീയ ടീമിലെ പ്രതിരോധ താരവും ഫിയോരെന്റിന നായകനുമായ ഫുട്‌ബോള്‍ താരം ഡേവിഡ് അസ്റ്റോരി മരണമടഞ്ഞു. ഉദീനിസെയുമായുള്ള സീരി പോരാട്ടത്തിനായി എത്തിയ ഡേവിഡ് അസ്റ്റോരി താമസിക്കുന്ന ഹോട്ടലില്‍ വച്ചാണ് മരണത്തിന് കീഴടങ്ങിയത്. ഹൃദയാഘാതമാണ് 31കാരനായ താരത്തിന്റെ മരണ കാരണമെന്ന് ഇറ്റാലിയന്‍ മാധ്യമങ്ങള്‍ റിപ്പോര്‍ട്ട് ചെയ്തു. ഇന്നലെ നടക്കേണ്ടിയിരുന്ന ഫെയോരെന്റിന- ഉദീനിസെ സീരി എ പോരാട്ടം മാറ്റിവച്ചു.
എ.സി മിലാനിലൂടെയാണ് അസ്റ്റോരി തന്റെ ഫുട്‌ബോള്‍ കരിയറിന് തുടക്കമിട്ടത്. പിന്നീട് കഗ്ലിയാരി, റോമ ടീമുകള്‍ക്കായി കളിച്ച ശേഷമാണ് താരം 2015ല്‍ ഫിയോരെന്റിനയ്ക്കായി കളിക്കാനെത്തിയത്. ഇറ്റലിക്കായി 14 മത്സരങ്ങള്‍ കളിച്ചിട്ടുണ്ട്.