തിരുവനന്തപുരം: വര്‍ക്ക് ഷോപ്പ് ഭൂമിയില്‍ കൊടിനാട്ടിയ വിഷമത്തില്‍ പ്രവാസി ജീവനൊടുക്കിയസംഭവവുമായി ബന്ധപ്പെട്ട് മുഖ്യമന്ത്രി നിയമസഭയില്‍ നടത്തിയ പ്രസ്താവന ദൗര്‍ഭാഗ്യകരമാണെന്ന് എഐവൈഎഫ്. സുഗതന്റെ മരണത്തില്‍ എഐവൈഎഫിനു പങ്കില്ല.

കൊടിനാട്ടി പ്രതിഷേധിക്കുന്ന സമരരീതി സംസ്ഥാന ചരിത്രത്തിലെ ആദ്യ സംഭവമല്ല. മറിച്ചുള്ള പ്രസ്താവനകള്‍ അടിസ്ഥാനരഹിതമാണെന്നും ഏത് അന്വേഷണത്തെയും സ്വാഗതം ചെയ്യുന്നുവെന്നും സംസ്ഥാന സെക്രട്ടറി മഹേഷ് കക്കത്ത് പറഞ്ഞു.

പാട്ടത്തിനെടുത്ത ഭൂമിയില്‍ കൊടിനാട്ടിയതിനെ തുടര്‍ന്ന് ഉടമ ആത്മഹത്യ ചെയ്ത സംഭവം നിര്‍ഭാഗ്യകരമാണെന്ന് മുഖ്യമന്ത്രി പറഞ്ഞിരുന്നു. നിയമം കൈയിലെടുക്കാന്‍ ആരേയും അനുവദിക്കില്ല. ഒരോ പാര്‍ട്ടിയുടേയും വിലപ്പെട്ടതാണ് കൊടി. അത് എവിടെങ്കിലും കൊണ്ടുപോയി നാട്ടുന്നതു ശരിയല്ല. ഏതു പാര്‍ട്ടിയാണെങ്കിലും അത്തരം നിലപാടുകള്‍ ശരിയല്ലെന്നും മുഖ്യമന്ത്രി പറഞ്ഞു.