ന്യൂഡല്‍ഹി: കള്ളപ്പണം വെളുപ്പിക്കല്‍ കേസില്‍ ആര്‍.ജെ.ഡി അധ്യക്ഷന്‍ ലാലുപ്രസാദ് യാദവിന്റെ മകള്‍ മിസ ഭാരതിയ്ക്കും ഭര്‍ത്താവ് ശൈലേഷ് കുമാറിനും പ്രത്യേക കോടതി ജാമ്യം അനുവദിച്ചു. കേസില്‍ ഇരുവരോടും ഇന്ന് നേരിട്ട് ഹാജരാവാന്‍ കോടതി നിര്‍ദ്ദേശിച്ചിരുന്നു.

രണ്ടു ലക്ഷം രൂപ വീതം ജാമ്യത്തുകയും സമാനതുകയുടെ ജാമ്യവസ്തുവും സമര്‍പ്പിക്കണമെന്നും ഇരുവരും രാജ്യം വിട്ടുപോകരുതെന്നും കോടതി ഉത്തരവിട്ടിട്ടുണ്ട്.

ഡിസംബര്‍ 23നാണ് മിസക്കും ഭര്‍ത്താവ് ശൈലേഷ് കുമാറിനും എതിരേ കേസെടുത്തിരുന്നത്.ഡല്‍ഹിയില്‍ അനധികൃതമായി സമ്പാദിച്ച പണം കൊണ്ട് ഫാം ഹൗസ് വാങ്ങിയെന്നാണ് കേസ്.

മിശൈല്‍ പാക്കേഴ്‌സ് ആന്‍ഡ് പ്രിന്റേഴ്‌സിന്റെ ഉടമസ്ഥതയിലുള്ള ഫാം ഹൗസ് മിസയുടേയും ഭര്‍ത്താവിന്റെയും പേരിലാണെന്ന് എന്‍ഫോഴ്‌സ്‌മെന്റ് അറിയിച്ചു. 200809 കാലഘട്ടത്തില്‍ 1.2 കോടി രൂപക്ക് വാങ്ങിച്ച ഫാം ഹൗസിന്റെ ഇടപാടുകള്‍ കള്ളപ്പണം ഉപയോഗിച്ചാണെന്നാണ് എന്‍ഫോഴ്‌സ്‌മെന്റ് ഡയരക്ടറേറ്റിന്റെ ആരോപണം.

ഡല്‍ഹി ആസ്ഥാനമായി പ്രവര്‍ത്തിക്കുന്ന ഒരു ഏജന്‍സിയാണ് ഇവര്‍ക്കു വേണ്ടി കള്ളപ്പണം വെളുപ്പിച്ചത്. ഇതിന്റെ ഉടമകളായ സുരേന്ദ്രകുമാര്‍ ജെയ്ന്‍, വീരേന്ദ്ര ജെയ്ന്‍ എന്നീ സഹോദരങ്ങളെ ഇ.ഡി നേരത്തെ ഇതേ കേസില്‍ അറസ്റ്റ് ചെയ്തിരുന്നു.