കാളികാവ്: പുല്ലങ്കോട് എസ്റ്റേറ്റില്‍ വീണ്ടും പുലിയിറങ്ങി. പുലിയുടെ മുന്നിലകപ്പെട്ട രണ്ട് തൊഴിലാളികള്‍ അദ്ഭുതകരമായി രക്ഷപ്പെട്ടു. കാളികാവ് ടൗണില്‍നിന്ന് ഒരു കിലോമീറ്റര്‍ അകലെ പുല്ലങ്കോട് എസ്‌റ്റേറ്റിലെ 2006 റീപ്ലാന്റിങ് ഏരിയയിലാണ് പുലിയെ കണ്ടത്. ഇന്നലെ രാവിലെയാണ് പുലിയുടെ മുന്നില്‍ തൊഴിലാളികള്‍ അകപ്പെട്ടത്. കൊടിയത്ത് സജിത്താണ് പുലര്‍ച്ചെ ബൈക്കില്‍ വരുമ്പോള്‍ പുലിയുടെ മുന്നിലകപ്പെട്ടത്.
ഇതേസമയം എതിര്‍ ദിശയിലൂടെ വന്ന മാട്ടറ മുജീബും പുലിയുടെ മുന്നിലകപ്പെട്ടു. രണ്ട് ഭാഗത്തായി ഇരുവരും നില്‍ക്കുന്നതിനിടെ പുലി വനത്തിലേക്ക് ഓടി മറയുകയായിരുന്നു.
കാളികാവിനടുത്ത ആറാം നമ്പര്‍ പാടിയിലേക്കും മേലേ കാളികാവ് പ്രദേശത്തെ നിരവധി കുടുംബങ്ങള്‍ക്കും കുടിവെള്ളത്തിനായി ഉപയോഗിക്കുന്ന ചോലയിലൂടെയാണ് പുലി ഓടി മറഞ്ഞത്. ഏതാനും മീറ്റര്‍ മാത്രം വ്യത്യാസത്തിലാണ് ഇരുവരും പുലിയുടെ മുന്നില്‍നിന്ന് രക്ഷപ്പെട്ടത്. ഇത് രണ്ടാം തവണയാണ് പുല്ലങ്കോട് എസ്‌റ്റേറ്റില്‍ പുലിയെ കാണുന്നത്. എസ്‌റ്റേറ്റിലെ വള്ളിപ്പൂള ചിങ്കക്കല്ല് ഭാഗത്തും മരുതങ്കാടിലും പുലിയെ കണ്ട വിവരം അറിയിച്ചെങ്കിലും അധികൃതര്‍ തുടര്‍ നടപടികളൊന്നും സ്വീരിച്ചില്ലെന്ന പരാതി നിലനിക്കുന്നതിനിടയിലാണ് കാളികാവില്‍ ഇന്നലെ പുലിയെ കണ്ടത്.
വേനല്‍ കടുക്കുന്നതോടെയാണ് വന്യ മൃഗങ്ങള്‍ വെള്ളവും ഭക്ഷണവും തേടിയാണ് വനത്തില്‍നിന്ന് നാട്ടിലേക്കിറങ്ങുന്നത്. കാട്ടാനയും കാട്ടുപന്നികളും നിത്യ സംഭവമായി മറിക്കൊണ്ടിരിക്കുന്നതിനിടെയാണ് പുലിയുടെ സാന്നിധ്യം കൂടി കാണപ്പെടുന്നത്. പുലിയെ കെണിവച്ച് പിടിക്കണമെന്ന് എസ്റ്റേറ്റ് അധികൃതരും തൊഴിലാളികളും ആവശ്യപ്പെട്ടു.