മലപ്പുറം: വിലനിലവാരം നിയന്ത്രിക്കാന്‍ ഇന്ധനവിലയുടെ അധിക നികുതിവരുമാനം വേണ്ടെന്നു വെക്കാന്‍ സംസ്ഥാന സര്‍ക്കാര്‍ തയ്യാറാവണമെന്നു മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ് ആവശ്യപ്പെട്ടു.  യുഡിഎഫ് സര്‍ക്കാര്‍ ഇത്തരത്തില്‍ തീരുമാനമെടുത്തതിലൂടെ ജനങ്ങള്‍ക്ക് ഏറെ ആശ്വാസമായിരുന്നു. അതേമാതൃക പിന്തുടരാന്‍ ഇടതു സര്‍ക്കാര്‍ തയ്യാറാവണം. സംസ്ഥാനത്തു രൂക്ഷമായ വിലക്കയറ്റം കൊണ്ടു ജനങ്ങള്‍ പൊറുതി മുട്ടുകയാണ്.   ജനജീവിതം ദുസഹമായ സാഹചര്യത്തില്‍ ഇന്ധന വില വര്‍ധനക്കനുസരിച്ച് സംസ്ഥനത്തിനു ലഭിക്കുന്ന അധിക നികുതി വരുമാനം വേണ്ടെന്നു വെക്കാന്‍ തയ്യാറായെ പറ്റൂ. യാതൊരു നിയന്ത്രണവുമില്ലാതെയാണു രാജ്യത്ത് ഇന്ധനവിലയുയരുന്നത്. അടിക്കടിയുള്ള ഇന്ധന വിലക്കയറ്റം ജനങ്ങളെ വലക്കുന്നുണ്ട്. തെരഞ്ഞെടുപ്പിനു ശേഷം മോദി സര്‍ക്കാര്‍ എണ്ണക്കമ്പനികള്‍ക്കു യഥേഷ്ടം വില കൂട്ടാന്‍ പ്രോല്‍സാഹനം നല്‍കുകയാണെന്നും മജീദ് ആരോപിച്ചു.