ഡര്‍ബന്‍: വിവാദങ്ങളും വാക്കുതര്‍ക്കങ്ങളുമായി നിറഞ്ഞ ഒന്നാം ക്രിക്കറ്റ് ടെസ്റ്റില്‍ ദക്ഷിണാഫ്രിക്കയെ വീഴ്ത്തി ആസ്‌ത്രേലിയ. 118 റണ്‍സിന്റെ വിജയമാണ് ഓസീസ് സ്വന്തമാക്കിയത്. സ്‌കോര്‍: ആസ്‌ത്രേലിയ ഒന്നാം ഇന്നിങ്‌സ് 351, രണ്ടാം ഇന്നിങ്‌സ് 227. ദക്ഷിണാഫ്രിക്ക ഒന്നാം ഇന്നിങ്‌സ് 162, രണ്ടാം ഇന്നിങ്‌സ് 298.
ഒന്നാം ഇന്നിങ്‌സില്‍ അഞ്ചും രണ്ടാം ഇന്നിങ്‌സില്‍ നാലും വിക്കറ്റെടുത്ത പേസര്‍ മിച്ചല്‍ സ്റ്റാര്‍ക്കിന്റെ മാരക ബൗളിങാണ് ദക്ഷിണാഫ്രിക്കന്‍ പതനം എളുപ്പത്തിലാക്കിയത്. സ്റ്റാര്‍ക്കാണ് കളിയിലെ താരം. മാര്‍ക്രം (143) സെഞ്ച്വറിയുമായി പൊരുതി.
മത്സരത്തിനിടെ എ.ബി ഡിവില്ല്യേഴ്‌സിനെ റണ്ണൗട്ടാക്കി, വീണുപോയ താരത്തിന്റെ ദേഹത്ത് പന്തെടുത്തിട്ട് ആഹ്ലാദിച്ച ഓസീസ് സ്പിന്നര്‍ നതാന്‍ ലിയോണിന്റെ മര്യാദയില്ലാത്ത പെരുമാറ്റം സമൂഹ മാധ്യമങ്ങളില്‍ വന്‍ വിവാദത്തിന് തിരികൊളുത്തിയിരുന്നു. പിന്നാലെ ഐ.സി.സി താരത്തിന് പിഴയും വിധിച്ചു. ഡ്രസിങ് റൂമിലേക്ക് പോകും വഴി ആസ്‌ത്രേലിയന്‍ താരം ഡേവിഡ് വാര്‍ണറും ദക്ഷിണാഫ്രിക്കന്‍ താരം ക്വിന്റന്‍ ഡി കോക്കും തമ്മില്‍ വാക്കേറ്റമുണ്ടായതും മത്സരത്തിന്റെ നിറം കെടുത്തി. വാര്‍ണര്‍ക്കെതിരേ ക്രിക്കറ്റ് ആസ്‌ത്രേലിയ അന്വേഷണം പ്രഖ്യാപിച്ചിട്ടുണ്ട്.