ചെന്നൈ: ത്രിപുരയില്‍ ലെനിന്റെ പ്രതിമ തകര്‍ത്തതുപോലെ തമിഴ്‌നാട്ടില്‍ പെരിയോറുടെ (പെരിയോര്‍ ഇ.വി രാമസ്വാമി) പ്രതിമയും തകര്‍ക്കുമെന്ന ബി.ജെ.പി നേതാവ് എച്ച്. രാജയുടെ പരാമര്‍ശം വിവാദത്തില്‍.
'ആരാണ് ലെനിന്‍, ഇന്ത്യാ ചരിത്രത്തില്‍ അദ്ദേഹത്തിന് എന്ത് പ്രാധാന്യമാണുള്ളത്. കമ്മ്യൂണിസവും ഇന്ത്യയും തമ്മില്‍ ഒരു ബന്ധവുമില്ല.
അതിനാലാണ് ത്രിപുരയില്‍ ലെനിന്റെ പ്രതിമ തകര്‍ത്തത്. അതേപോലെ ജാതീയതക്ക് പ്രോത്സാഹനം നല്‍കിയ പെരിയോറുടെ പ്രതിമയും തമിഴ്‌നാട്ടില്‍ തകര്‍ക്കണ'മെന്നാണ് രാജ ഫേസ്ബുക്കില്‍ കുറിച്ചത്.
സാമൂഹിക പരിഷ്‌കര്‍ത്താവും രാഷ്ട്രീയനേതാവുമായിരുന്ന പെരിയോര്‍ ഇ.വി രാമസ്വാമിയെ ദ്രാവിഡ രാഷ്ട്രീയത്തിന്റെ പിതാവ് എന്നാണ് വിശേഷിപ്പിക്കുന്നത്. അതേസമയം, വിവാദ പരാമര്‍ശം നടത്തിയ ബി.ജെ.പി നേതാവിനെ ഗുണ്ടാ നിയമപ്രകാരം അറസ്റ്റ് ചെയ്യണമെന്ന് ഡി.എം.കെ വര്‍ക്കിങ് പ്രസിഡന്റ് എം.കെ സ്റ്റാലിന്‍ ആവശ്യപ്പെട്ടു.
പെരിയോറുടെ പ്രതിമ തൊടാന്‍ ആരെയും അനുവദിക്കില്ല. രാജയുടെ പൂര്‍വികര്‍പോലും പെരിയോറുടെ പ്രതിമയില്‍ തൊടാന്‍ ധൈര്യപ്പെട്ടിട്ടില്ലെന്നും സ്റ്റാലിന്‍ കൂട്ടിച്ചേര്‍ത്തു. ഇതിനുപിന്നാലെ തമിഴ്‌നാട്ടിലെ വിവിധ പാര്‍ട്ടി നേതാക്കളും സംഘടനകളും രാജയുടെ ഫേസ്ബുക്ക് കുറിപ്പിനെതിരേ പ്രതിഷേധം ശക്തമാക്കിയിട്ടുണ്ട്.
പെരിയോറുടെ പ്രതിമ തകര്‍ക്കപ്പെടുമെന്ന് യുവമോര്‍ച്ച നേതാവ് എസ്.ജി സൂര്യ ട്വീറ്റ് ചെയ്തതിനുപിന്നാലെയാണ് രാജയുടെ പരാമര്‍ശവും ഉണ്ടായത്.
അതിനിടയില്‍ വെല്ലൂരിനടുത്ത തിരിപത്തൂര്‍ ജംഗ്ഷനില്‍ സ്ഥാപിച്ച പെരിയോറുടെ പ്രതിമ ചൊവ്വാഴ്ച രാത്രി ബി.ജെ.പി പ്രവര്‍ത്തകര്‍ തകര്‍ത്തു.
സംഭവുമായി ബന്ധപ്പെട്ട ബി.ജെ.പി പ്രാദേശിക നേതാക്കളായ മുത്തു രാമന്‍,ഫ്രാന്‍സിസ് എന്നിവരെ പൊലിസ് അറസ്റ്റ് ചെയ്തു.