ചെറുപുഴ: വ്യാജ പാസ് ഉപയോഗിച്ച് മണല്‍ കടത്തുന്ന മൂന്നംഗ സംഘം അറസ്റ്റില്‍. പ്രാപ്പൊയില്‍ സ്വദേശി ചാലയില്‍ വളപ്പില്‍ റംഷാദ്(30), വങ്ങാട് സ്വദേശി ഒതയോത്ത് മുഹമ്മദ് സമീര്‍(19), വയക്കരയിലെ തയ്യില്‍ നിഷാദ്(26) എന്നിവരെയാണ് ചെറുപുഴ എസ്.ഐ കെ.വി സ്മിതേഷും സംഘവും അറസ്റ്റു ചെയ്തത്. ഇവരുടെ വാഹനവും പാസ് നിര്‍മാണത്തിനുപയോഗിച്ച ലാപ്‌ടോ   പ്, കംപ്യൂട്ടര്‍, പ്രിന്റര്‍, വ്യാജ സീലുകള്‍, പേപ്പറുകള്‍ എന്നിവ      പിടിച്ചെടുത്തു. ആറോളം വ്യാജ പാസുകളും കണ്ടെടുത്തു.
വ്യാജ പാസ് ഉപയോഗിച്ച് മണല്‍ കടത്തുന്നുണ്ടെന്നുള്ള രഹസ്യവിവരത്തെ തുടര്‍ന്ന് പൊലിസ് നടത്തിയ വാഹന പരിശോധനയിലാണ് സംഘം പിടിയിലായത്. ഇന്നലെ ഉച്ചയോടെ മണലുമായി എത്തിയ ലോറി പരിശോധിച്ചപ്പോഴാണ് വ്യാജ പാസ് കണ്ടെത്തിയത്. റംഷാദാണ് ലോറി ഓടിച്ചിരുന്നത്. തുടര്‍ന്നു നടത്തിയ അന്വേഷണത്തിലാണ് മറ്റു രണ്ടുപേരെയും പിടികൂടിയത്. വിദ്യാര്‍ഥിയായ മുഹമ്മദ് സമീര്‍ വ്യാജ പാസ് നിര്‍മിച്ച് റംഷാദിനെ ഏല്‍പിക്കുകയാണ് പതിവ്. അതിനുള്ള പ്രിന്റര്‍ റംഷാദ് വാങ്ങിക്കൊടുക്കുകയായിരുന്നു.
പ്രിന്ററും ലാപ്‌ടോപും സീലുകളും വ്യാജ പാസുണ്ടാക്കാന്‍ ഉപയോഗിക്കുന്ന പേപ്പറുകളും സമീറിന്റെ വീട്ടില്‍ നിന്നു പൊലിസ് കണ്ടെത്തുകയായിരുന്നു. പാസ് കംപ്യൂട്ടറില്‍ പ്രിന്റ് ചെയ്തതിനു ശേഷം ഒറിജിനല്‍ പാസിന്റെ ഹോളോഗ്രാം പറിച്ചെടുത്ത് ഒട്ടിക്കുകയാണ് പതിവെന്ന് ഇവര്‍ പൊലിസിനോട് പറഞ്ഞു. സിവില്‍ പൊലിസ് ഓഫിസര്‍മാരായ ഫ്രാന്‍സിസ്, പ്രസേനന്‍ ഭാസ്‌കരന്‍, ജയന്‍ എന്നിവരും   പൊലിസ് സംഘത്തിലുണ്ടായിരുന്നു.