തിരൂരങ്ങാടി: മന്ത് രോഗ നിര്‍മാര്‍ജനത്തിന്റെ ഭാഗമായി തിരൂരങ്ങാടി താലൂക്കാശുപത്രിയില്‍ നടത്തിയ അന്യ സംസ്ഥാനക്കാരുടെ രക്തപരിശോധനാ ഫലം പുറത്തുവന്നു. ജനുവരി 29ന് എടുത്ത 264പേരുടെ രക്ത സാംപിളുകളാണ് പരിശോധനയ്ക്ക് വിധേയമാക്കിയത്.
ഇതില്‍ ജാര്‍ഖണ്ഡ് സംസ്ഥാനക്കാരായ രണ്ടുപേരുടെ രക്തത്തില്‍ മന്ത് രോഗത്തിനുകാരണമായ മൈക്രോഫൈലേറിയ വിരകളെ കണ്ടെത്തി. ഇതില്‍ ഒരാള്‍ക്ക് ചികിത്സാനടപടികള്‍ ആരംഭിച്ചു. എന്നാല്‍ മറ്റൊരാള്‍ നാട്ടിലേക്ക് തിരിച്ചുപോയതായാണ് വിവരം. ഇതരസംസ്ഥാന തൊഴിലാളികളുടെ രക്തത്തില്‍ മന്ത് വിരകളുടെ സാന്നിധ്യം കൂടുതല്‍ കണ്ടുവരുന്നതിന്റെ പശ്ചാത്തലത്തിലാണ് മലപ്പുറം ജില്ലാ വെക്ടര്‍ കണ്‍ട്രോള്‍ യൂനിറ്റ് തിരൂരങ്ങാടി താലൂക്ക് പരിധിയില്‍ താമസിക്കുന്ന ഇതര സംസ്ഥാനങ്ങളിലെ ആളുകള്‍ക്ക് രാത്രികാല ക്യാംപ് ഒരുക്കിയത്. രാത്രികാലങ്ങളിലാണ് വിരകളെ കണ്ടെത്താന്‍ സാധിക്കുക എന്നതിനാല്‍ താലൂക്കാശുപത്രി കോംപൗണ്ടില്‍ നാല് സെക്ഷനുകളാക്കി തിരിച്ചായിരുന്നു രക്തശേഖരണം. തുടര്‍ന്ന് സാംപിളുകള്‍ ഡി.സി.വിയുടെ ലബോറട്ടറിയിലേക്ക് കൊണ്ടുപോകുകയായിരുന്നു.