ആലക്കോട്: തളിപ്പറമ്പ്-കൂര്‍ഗ് ബോര്‍ഡര്‍ റോഡില്‍ വ്യത്യസ്ത വാഹനാപകടങ്ങളില്‍ നാല് യുവാക്കള്‍ക്ക് പരുക്കേറ്റു. രാവിലെ 11 മണിയോടെ കരുവഞ്ചാല്‍ മീമ്പറ്റിയിലും വൈകുന്നേരം അഞ്ചോടെ അമ്മന്‍കുളത്തുമായിരുന്നു അപകടം. ആലക്കോട് ഭാഗത്ത്‌നിന്നു വന്ന ബൈക്ക് എതിരേ വരികയായിരുന്ന മറ്റൊരു ബൈക്കുമായി കൂട്ടിയിടിച്ചായിരുന്നു മീമ്പറ്റിയിലെ അപകടം. തളിപ്പറമ്പ് ഭാഗത്ത്‌നിന്നു അമിത വേഗതയില്‍ വന്ന ബൈക്ക് അമ്മന്‍കുളം ക്രിസ്ത്യന്‍ പള്ളിക്ക് സമീപം മതിലില്‍ ഇടിച്ചായിരുന്നു മറ്റൊരപകടം. പരുക്കേറ്റവരെ തളിപ്പറമ്പിലെ സ്വകാര്യ ആശുപത്രിയില്‍ പ്രവേശിപ്പിച്ചു. അടുത്തകാലത്തായി നിരവധി ഇരുചക്രവാഹനങ്ങളാണ് ഈ റോഡില്‍ അപകടത്തില്‍ പെടുന്നത്. അമിതവേഗത നിയന്ത്രിക്കുന്നതിനുള്ള നടപടികള്‍ പൊലിസിന്റെ ഭാഗത്ത്‌നിന്ന് ഉണ്ടാകാത്തതാണ് അപകടങ്ങള്‍ തുടര്‍ക്കഥയാവാന്‍ കാരണമെന്നും ആരോപണമുണ്ട്.