നീലേശ്വരം: മരണവീട്ടില്‍ നിന്നു മടങ്ങവെ ബൈക്ക് അപകടത്തില്‍ പെട്ട് യുവാവിനെ ആശുപത്രിയില്‍ പ്രവേശിപ്പിച്ചു.ഇദ്ദേഹത്തെ കാണാന്‍ പോയവര്‍ സഞ്ചരിച്ച വാഹനം അപകടത്തില്‍ പെട്ട് മറ്റു നാലുപേര്‍ക്കു കൂടി പരുക്കേറ്റു.
കഴിഞ്ഞ ദിവസം നിര്യാതയായ കരിന്തളം വടക്കേ പുലിയന്നൂരിലെ പി. കണ്ണന്റെ ഭാര്യ ചാപ്പയില്‍ കല്യാണി(68)യുടെ വീട്ടില്‍ പോയി തിരിച്ചു വരുന്നതിനിടെയാണ് ഇന്നലെ രാവിലെ പത്തോടെ വടക്കേ പുലിയന്നൂരിലെ കെ.വി ബാലകൃഷ്ണന്‍ (40) അപകടത്തില്‍ പെട്ടത്.ഇദ്ദേഹം സഞ്ചരിച്ച ബൈക്കിനു കുറുകെ നായ ചാടിയതിനെ തുടര്‍ന്നു നിയന്ത്രണം വിട്ടപ്പോള്‍ പിറകില്‍ നിന്നു വന്ന മറ്റൊരു ബൈക്ക് ഇടിക്കുകയായിരുന്നു.
അപകടത്തെ തുടര്‍ന്നു മാവുങ്കാല്‍ സഞ്ജീവനി ആശുപത്രിയില്‍ പ്രവേശിപ്പിക്കപ്പെട്ട ബാലകൃഷ്ണനെ കാണാന്‍ പോവുകയായിരുന്നവര്‍ സഞ്ചരിച്ച ഓട്ടോ കാഞ്ഞങ്ങാട് ജില്ലാ ആശുപത്രിക്കു സമീപം ഓട്ടോയുമായി കൂട്ടിയിടിച്ചു. ഓട്ടോഡ്രൈവര്‍ കെ.വി രാജേന്ദ്രന്‍ (35), കെ. സുമേഷ് (27), പി.എം രമേശന്‍ (40),കെ. രതീഷ് (32) എന്നിവര്‍ക്ക് ഈ അപകടത്തില്‍ പരുക്കേറ്റു.
ഗുരുതരമായി പരുക്കേറ്റ രാജേന്ദ്രന്‍, സുമേഷ് എന്നിവരെ മംഗളൂരുവിലെ ആശുപത്രിയില്‍ പ്രവേശിപ്പിച്ചു.