കൊല്ലം: പത്താംക്ലാസ് പരീക്ഷ എഴുതാന്‍ സ്‌കൂളിലേക്ക് ഓട്ടോയില്‍ പോയ വിദ്യാര്‍ഥിനികള്‍ക്ക് മുന്നില്‍ ഓട്ടോഡ്രൈവറുടെ നഗ്നതാ പ്രദര്‍ശനം. സംഭവത്തെത്തുടര്‍ന്ന് കുട്ടികള്‍ ഓട്ടോയില്‍നിന്ന് ചാടി രക്ഷപ്പെട്ടു.
നാട്ടുകാര്‍ ഓടിയെത്തിയപ്പോഴേക്കും ഓട്ടോക്കാരന്‍ വാഹനവുമായി രക്ഷപ്പെട്ടു.
തുടര്‍ന്ന് പൊലിസെത്തി ഇവരെ പരീക്ഷയെഴുതാനായി സ്‌കൂളിലെത്തിക്കുകയായിരുന്നു. ഇന്നലെ രാവിലെ 11.45 നായിരുന്നു സംഭവം. നഗരത്തില്‍ വെടിക്കുന്നിന് സമീപത്ത് നിന്നാണ് അഞ്ച് വിദ്യാര്‍ഥിനികളെ കൊല്ലം വിമലഹൃദയ ഹയര്‍സെക്കന്‍ഡറി സ്‌കൂളില്‍ പരീക്ഷയെഴുതാന്‍ ഒപ്പമുള്ള ഒരു വിദ്യാര്‍ഥിനിയുടെ മാതാവ് ഓട്ടോയില്‍ കയറ്റി വിട്ടത്.
സ്‌കൂളിലേക്കുള്ള വഴിയിലെ മുണ്ടക്കല്‍ റെയില്‍വേ ഗേറ്റ് അടഞ്ഞു കിടക്കുകയാണെന്ന് കള്ളംപറഞ്ഞ മധ്യവയസ്‌കനായ ഡ്രൈവര്‍ മറ്റൊരു വഴിയിലൂടെ പോവുകയും കപ്പലണ്ടിമുക്കിന് സമീപത്തുവച്ച് നഗ്‌നത പ്രദര്‍ശിപ്പിക്കുകയുമായിരുന്നു.
ഇതിനെ തുടര്‍ന്ന് പേടിച്ച കുട്ടികള്‍ ഓടിക്കൊണ്ടിരുന്ന വാഹനത്തില്‍നിന്ന് ചാടുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. നാട്ടുകാര്‍ അറിയിച്ചതിനെ തുടര്‍ന്ന് ബന്ധുക്കളും പൊലിസും സ്ഥലത്തെത്തി കുട്ടികളെ സ്‌കൂളിലെത്തിച്ച് പരീക്ഷ എഴുതാന്‍ അവസരം ഒരുക്കി. പരിഭ്രാന്തിയില്‍ പെണ്‍കുട്ടികള്‍ പുറത്തേക്ക് ചാടിയപ്പോള്‍ ഒരു കുട്ടിയുടെ ബാഗും ഹാള്‍ ടിക്കറ്റും ഓട്ടോയില്‍ തന്നെയായിരുന്നു.
പരീക്ഷക്ക് ശേഷം പൊലിസ് കുട്ടികളുടെ മൊഴി രേഖപ്പെടുത്തി. സംഭവത്തില്‍ അന്വേഷണം തുടങ്ങിയിട്ടുണ്ട്.
പെണ്‍കുട്ടികളെ തട്ടിക്കൊണ്ടുപോകാന്‍ ശ്രമിച്ചതിനും കേസെടുത്തിട്ടുണ്ട്. നഗരത്തിലെ ഓട്ടോ ഡ്രൈവര്‍മാരില്‍ ചിലര്‍ മദ്യവും മറ്റു ലഹരിമരുന്നുകളും ഉപയോഗിച്ചാണ് വണ്ടി ഓടിക്കുന്നതെന്ന ആരോപണം നേരത്തേ ഉയര്‍ന്നിരുന്നു.