ലണ്ടന്‍: ടോട്ടനം ഹോട്‌സ്പറിനെതിരേ നിര്‍ണായക എവേ പോരാട്ടത്തില്‍ ഉജ്ജ്വല വിജയം പിടിച്ച് ഇറ്റാലിയന്‍ കരുത്തരായ യുവന്റസ് യുവേഫ ചാംപ്യന്‍സ് ലീഗിന്റെ ക്വാര്‍ട്ടറിലേക്ക് കടന്നു. സ്വന്തം മണ്ണില്‍ ബാസലിനോട് അപ്രതീക്ഷതമായി തോറ്റെങ്കിലും ആദ്യ പാദത്തിലെ നാല് എവേ ഗോളിന്റെ ബലത്തില്‍ ഇംഗ്ലീഷ് പ്രീമിയര്‍ ലീഗില്‍ കിരീടമുറപ്പിച്ച മാഞ്ചസ്റ്റര്‍ സിറ്റിയും ക്വാര്‍ട്ടറിലെത്തി.
നാടകീയമായ തിരിച്ചുവരാണ് യുവന്റസ് ടോട്ടനത്തിനെതിരേ നടത്തിയത്. ആദ്യ പാദ പോരാട്ടത്തില്‍ സ്വന്തം തട്ടകത്തില്‍ 2-2ന് സമനില വഴങ്ങി രണ്ട് ഗോള്‍ കടവുമായാണ് യുവന്റസ് ടോട്ടനത്തിന്റെ തട്ടകത്തില്‍ കളിക്കാനെത്തിയത്. 39ാം മിനുട്ടില്‍ സന്‍ ഹോങ് മിനിന്റെ ഗോളില്‍ ടോട്ടനം ലീഡെടുത്തതോടെ യുവന്റസിന്റെ സാധ്യതകള്‍ക്ക് വീണ്ടും തിരിച്ചടിയേറ്റു. എന്നാല്‍ മത്സരം പുരോഗമിച്ച് രണ്ടാം പകുതി കടന്ന് മുന്നേറവേ മൂന്ന് മിനുട്ടിനിടെ രണ്ട് ഗോളുകള്‍ വലയിലാക്കിയാണ് ടോട്ടനത്തിന്റെ സ്വപ്നങ്ങള്‍ യുവന്റസ് തല്ലിക്കെടുത്തിയത്. 64ാം മിനുട്ടില്‍ ഗോണ്‍സാലോ ഹിഗ്വയ്ന്‍ യുവന്റസിന് സമനില സമ്മാനിച്ചു. മൂന്ന് മിനുട്ടിനുള്ളില്‍ 67ാം മിനുട്ടില്‍ പോളോ ഡിബാലയുടെ ഗോളില്‍ യുവന്റസ് വിജയവും ക്വാര്‍ട്ടര്‍ ബര്‍ത്തും ഉറപ്പാക്കി. ഇരു പാദ പോരാട്ടത്തില്‍ 4-3ന്റെ വിജയവുമായാണ് യുവന്റസിന്റെ ക്വാര്‍ട്ടര്‍ പ്രവേശം.
സ്വന്തം തട്ടകത്തില്‍ അപ്രതീക്ഷിത തോല്‍വി വഴങ്ങിയിട്ടും മാഞ്ചസ്റ്റര്‍ സിറ്റി സുരക്ഷിതമായി തന്നെ ചാംപ്യന്‍സ് ലീഗിന്റെ അവസാന എട്ടിലേക്ക് കടന്നു. ആദ്യ പാദത്തില്‍ മറുപടിയില്ലാത്ത നാല് ഗോളുകള്‍ക്ക് ബാസലിനെ തകര്‍ത്ത് സ്വന്തം സ്റ്റേഡിയമായ എത്തിഹാദില്‍ രണ്ടാം പാദം കളിച്ച സിറ്റിയെ 1-2ന് വീഴ്ത്താന്‍ ബാസിലിന് സാധിച്ചു. എന്നാല്‍ ആദ്യ പാദത്തില്‍ വഴങ്ങിയ നാല് ഗോളുകള്‍ അവരുടെ പുറത്തേക്കുള്ള വഴി തുറക്കുന്നതായിരുന്നു. ഇരു പാദങ്ങളിലായി 5-2ന്റെ തോല്‍വിയാണ് ബാസല്‍ വഴങ്ങിയത്.
കളിയുടെ ഏഴാം മിനുട്ടില്‍ ഗബ്രിയേല്‍ ജീസസിലൂടെ സിറ്റിയാണ് മുന്നിലെത്തിയത്. എന്നാല്‍ 17ാം മിനുട്ടില്‍ എല്യോനൗസിയും 71ല്‍ ലാംഗും നേടിയ ഗോളുകള്‍ ബാസലിന് വിജയമൊരുക്കി. ഇതോടെ ക്വാര്‍ട്ടറിലേക്ക് കടന്ന ടീമുകളുടെ എണ്ണം നാലായി. നേരത്തെ ലിവര്‍പൂള്‍, റയല്‍ മാഡ്രിഡ് ടീമുകളും അവസാന എട്ടില്‍ സീറ്റുറപ്പിച്ചിരുന്നു.