കൊച്ചി: വിവാദമായ എറണാകുളം-അങ്കമാലി അതിരൂപതയിലെ ഭൂമിയിടപാടുമായി ബന്ധപ്പെട്ട പ്രശ്‌നങ്ങള്‍ അവസാനിക്കുന്നതുവരെ കര്‍ദിനാളിന്റെ ചുമതലകളില്‍ നിന്ന് മാര്‍ ജോര്‍ജ് ആലഞ്ചേരി മാറിനില്‍ക്കണമെന്ന് വൈദികരുടെ കൂട്ടായ്മ. ഇതുസംബന്ധിച്ച് വൈദികര്‍ ഒപ്പിട്ട നിവേദനം സഹായമെത്രാന്‍ സെബാസ്റ്റ്യന്‍ എടയന്ത്രത്തിന് വൈദികര്‍ കൈമാറി. കര്‍ദിനാളിന്റെ അരമനക്ക് സമീപമുള്ള സെന്റ് മേരീസ് ബസലിക്കയില്‍ നിന്ന് പ്രകടനമായാണ് വൈദികര്‍ അരമനയിലേക്ക് എത്തിയത്. ഈ സമയം കര്‍ദിനാള്‍ സ്ഥലത്തില്ലാതിരുന്നതിനാല്‍ സഹായമെത്രാന്‍ മാര്‍ എടയന്ത്രത്തിന് നിവേദനം നല്‍കുകയായിരുന്നു. നിവേദനത്തിലെ വിഷയം സിനഡിനെയും മാര്‍പാപ്പയെയും അറിയിക്കണമെന്നും വൈദികരുടെ കൂട്ടായ്മ സഹായമെത്രനോട് ആവശ്യപ്പെട്ടു.
ഭൂമിയിടപാടുമായി ബന്ധപ്പെട്ട് കാനോനിക നിയമങ്ങള്‍ ലംഘിക്കപ്പെട്ടിട്ടുണ്ടെന്ന് സിനഡ് ചുമതലപ്പെടുത്തിയ സമിതിയുടെ അന്വേഷണത്തില്‍ വ്യക്തമായതായി വൈദിക സമിതി സെക്രട്ടറി ഫാ. കുര്യാക്കോസ് മുണ്ടാടന്‍ മാധ്യമപ്രവര്‍ത്തകരോട് പറഞ്ഞു.
അതിരൂപതയുടെ കടം തീര്‍ക്കാനായി നടത്തിയ ഭൂമിയിടപാടില്‍ 50 കോടി രൂപയാണ് നഷ്ടപ്പെട്ടത്. സഭാസംവിധാനങ്ങളും ചട്ടക്കൂടുകളും നിഷ്‌കര്‍ഷിക്കുന്ന നിയമങ്ങള്‍ അട്ടിമറിച്ചുള്ള രഹസ്യഇടപാടായിരുന്നു ഇത്. നടക്കാതെ പോയ ഇടപാട് നടന്നിരുന്നെങ്കില്‍ 100 കോടിയുടെ നഷ്ടം സംഭവിക്കുമായിരുന്നു.
ഇന്ത്യയില്‍ തന്നെ ഏറ്റവും സാമ്പത്തിക ഭദ്രതയുണ്ടായിരുന്ന അതിരൂപത ഇപ്പോള്‍ 86 ലക്ഷം പ്രതിമാസം വായ്പാ തിരിച്ചടവ് നടത്തേണ്ട അവസ്ഥയിലാണുള്ളത്. മൂന്ന് വര്‍ഷം മുന്‍പുവരെ ബാങ്ക് ലോണുകള്‍ ഇല്ലാതിരുന്ന അതിരൂപതയുടെ ഭൂരിഭാഗം ഭൂമിയും ഇപ്പോള്‍ വായ്പകള്‍ക്കായി പണയം വച്ചിരിക്കുകയാണ്.
കര്‍ദിനാളിനോടും ഇടപാടുമായി ബന്ധപ്പെട്ട മറ്റുകക്ഷികളോടും യഥാര്‍ഥത്തില്‍ സംഭവിച്ചതെന്താണെന്ന് വൈദികസമിതിയിലോ ഇതര സഭാവേദികളിലോ വെളിപ്പെടുത്താന്‍ പറഞ്ഞിരുന്നു. ഇത് കര്‍ദിനാള്‍ തള്ളിയതാണ് വിവാദത്തെ ഹൈക്കോടതിയിലെത്തിച്ചത്. സഭയുടെ ചരിത്രത്തിലെ ആദ്യത്തെ സംഭവമാണിതെന്നും അദ്ദേഹം പറഞ്ഞു. കര്‍ദിനാള്‍ മാറിനില്‍ക്കണമെന്നത് ഒന്നോ രണ്ടോ വൈദികരുടെ പ്രശ്‌നമല്ല. രൂപതയിലെ 458 വൈദികരില്‍ 448 പേരും ചേര്‍ന്നെടുത്ത തീരുമാനപ്രകാരമാണ് ഈ ആവശ്യം ഉന്നയിക്കുന്നതെന്നും ഫാ. കുര്യാക്കോസ് പറഞ്ഞു.