പോര്‍ട്ട് എലിസബത്ത്: അഞ്ച് വിക്കറ്റുകള്‍ വീഴ്ത്തി കഗിസോ റബാഡ കൊടുങ്കാറ്റായപ്പോള്‍ രണ്ടാം ക്രിക്കറ്റ് ടെസ്റ്റില്‍ ദക്ഷിണാഫ്രിക്കക്കെതിരേ ആസ്‌ത്രേലിയ ഒന്നാം ഇന്നിങ്‌സില്‍ 243ന് പുറത്ത്. മറുപടി ബാറ്റിങ് തുടങ്ങിയ ദക്ഷിണാഫ്രിക്ക ഒന്നാം ദിനം കളി നിര്‍ത്തുമ്പോള്‍ ഒരു വിക്കറ്റ് നഷ്ടത്തില്‍ 39 റണ്‍സെന്ന നിലയില്‍. ഒന്‍പത് വിക്കറ്റുകള്‍ കൈയിലിരിക്കേ ആസ്‌ത്രേലിയന്‍ സ്‌കോറിനൊപ്പമെത്താന്‍ ദക്ഷിണാഫ്രിക്കയ്ക്ക് 204 റണ്‍സ് കൂടി വേണം. 11 റണ്‍സെടുത്ത മാര്‍ക്രമാണ് പുറത്തായത്. പാറ്റ് കമ്മിന്‍സ് താരത്തെ വിക്കറ്റിന് മുന്നില്‍ കുടുക്കുകയായിരുന്നു. കളി അവസാനിക്കുമ്പോള്‍ രാത്രി കാവല്‍ക്കാരന്‍ കഗിസോ റബാഡ (17), ഓപണര്‍ ഡീന്‍ എല്‍ഗാര്‍ (11) എന്നിവരാണ് ക്രീസില്‍.
ടോസ് നേടി ബാറ്റിങ് തിരഞ്ഞെടുത്ത ആസ്‌ത്രേലിയക്കായി ബെന്‍ക്രോഫ്റ്റും വാര്‍ണറും ചേര്‍ന്ന ഓപണിങ് സഖ്യം മികച്ച തുടക്കമാണ് നല്‍കിയത്. ഇരുവരും ചേര്‍ന്ന് ഒന്നാം വിക്കറ്റില്‍ 98 റണ്‍സെടുത്തു. ബെന്‍ക്രോഫ്റ്റ് (38), വാര്‍ണര്‍ (63) എന്നിവര്‍ പുറത്തായ ശേഷം ക്യാപ്റ്റന്‍ സ്മിത്ത് (25), ഷോണ്‍ മാര്‍ഷ് (24), ടിം പെയ്ന്‍ (36) എന്നിവരും പിടിച്ചുനില്‍ക്കാന്‍ ശ്രമം നടത്തിയെങ്കിലും അതൊന്നും ഫലിച്ചില്ല. സ്മിത്തിനെ പുറത്താക്കി വിക്കറ്റ് വേട്ടയ്ക്ക് തുടക്കമിട്ട റബാഡ ഓസീസ് വാലറ്റത്തെ ക്ഷണത്തില്‍ കൂടാരം കയറ്റി ഇന്നിങ്‌സിന് തിരശ്ശീലയിടുകയായിരുന്നു. റബാഡ അഞ്ച് വിക്കറ്റുകള്‍ വീഴ്ത്തിയപ്പോള്‍ എന്‍ഗിഡി മൂന്നും ഫിലാന്‍ഡര്‍ രണ്ടും വിക്കറ്റുകള്‍ വീഴ്ത്തി പിന്തുണച്ചു.