തിരുവനന്തപുരം: കെഎസ്ആര്‍ടിസി പെന്‍ഷന്‍ പ്രായം കൂട്ടുന്നതു ചര്‍ച്ചചെയ്യുമെന്ന് ഗതാഗത മന്ത്രി എ.കെ ശശീന്ദ്രന്‍. ഇപ്പോഴത്തെ പ്രതിസന്ധി മറികടക്കാനാണ് പെന്‍ഷന്‍ പ്രായം കൂട്ടുന്നത്. മുന്നണിയിലെ എല്ലാ കക്ഷികളും അനുകൂലിച്ചാല്‍ മാത്രമേ പെന്‍ഷന്‍ പ്രായം കൂട്ടുകയുള്ളുവെന്നും മന്ത്രി പറഞ്ഞു.

കെ.എസ്.ആര്‍.ടി.സി ജീവനക്കാരുടെ പെന്‍ഷന്‍ പ്രായം 60 ആക്കി ഉയര്‍ത്തണമെന്ന നിര്‍ദേശം സംബന്ധിച്ച് മുഖ്യമന്ത്രി പിണറായി വിജയന്‍ ഇടതുമുന്നണി ഘടകകക്ഷികളുടെ അഭിപ്രായം തേടിയിരുന്നു.

കെ.എസ്.ആര്‍.ടിസിയെ പുനരുദ്ധരിക്കാന്‍ പ്രൊഫ. സുശീല്‍ ഖന്നയുടെ ശുപാര്‍ശകളുടെ അടിസ്ഥാനത്തില്‍ ഗതാഗത വകുപ്പ് തയാറാക്കിയ പാക്കേജിലാണ് പെന്‍ഷന്‍ പ്രായം 60 ആക്കണമെന്ന നിര്‍ദേശമുള്ളത്. പാക്കേജ് ഫെബ്രുവരി 27നു ചേര്‍ന്ന മന്ത്രിസഭായോഗത്തിന്റെ പരിഗണനയ്ക്കു വന്നിരുന്നെങ്കിലുംഭിപ്രായമുയര്‍ന്നതിനെ തുടര്‍ന്ന് മാറ്റിവയ്ക്കുകയായിരുന്നു. കെ.എസ്.ആര്‍.ടിസിയില്‍ പെന്‍ഷന്‍ പ്രായം കൂട്ടിയാല്‍ മറ്റു വകുപ്പുകളിലും അതു വേണ്ടിവരുമെന്ന് ചില മന്ത്രിമാര്‍ യോഗത്തില്‍ പറഞ്ഞിരുന്നു. ഇതിനെ തുടര്‍ന്ന് ചര്‍ച്ച ചെയ്ത ശേഷം തീരുമാനമെടുത്താല്‍ മതിയെന്ന ധാരണയിലാണ് പാക്കേജ് മാറ്റിവച്ചത്.