പോര്‍ട്ട് എലിസബത്: ദക്ഷിണാഫ്രിക്കയും ആസ്‌ത്രേലിയയും തമ്മിലുള്ള രണ്ടാം ടെസ്റ്റില്‍ ദക്ഷിണാഫ്രിക്കക്ക് 20 റണ്‍സിന്റെ ലീഡ്.
39 റണ്‍സിന് ഒരു വിക്കറ്റ് എന്ന സ്‌കോറിലായിരുന്നു രണ്ടാം ദിനം ദക്ഷിണാഫ്രിക്ക ബാറ്റിങ്ങ് തുടങ്ങിയത്. എന്നാല്‍ 60 റണ്‍സാകുന്നതിന് മുമ്പെ ദക്ഷിണാഫ്രിക്കയുടെ രണ്ടാം വിക്കറ്റും നഷ്ടമായി. ദക്ഷിണാഫ്രിക്കന്‍ ബോളര്‍ റബാഡയാണ് 29 റണ്‍സുമായി പുറത്തായത്. ലഞ്ചിനു പിരിയുമ്പോള്‍ 110 റണ്‍സിന് രണ്ട് വിക്കറ്റ് എന്ന നിലയിലായിരുന്നു ദക്ഷിണാഫ്രിക്ക. രണ്ടാം ദിനം കളിനിര്‍ത്തുമ്പോള്‍ ഏഴു വിക്കറ്റ് നഷ്ടത്തില്‍ ദക്ഷിണാഫ്രിക്ക 263 റണ്‍സെടുത്തിട്ടുണ്ട്. ഡിവില്ലേഴ്‌സിന്റെ 74 റണ്‍സിന്റെ പിന്‍ബലത്തിലായിരുന്നു ദക്ഷിണാഫ്രിക്കക്ക് ആസ്‌ത്രേലിയയെ മറികടക്കാനായത്. 14 റണ്‍സുമായി ഫിലാന്‍ഡറും 74 റണ്‍സുമായി ഡിവില്ലേഴ്‌സുമാണ് ക്രീസിലുള്ളത്. സ്‌കോര്‍. ഡീന്‍ എല്‍ഗര്‍ (57), എയ്ഡന്‍ മാര്‍ക്രം (11), കാഗിസോ റബാഡ (29), ഹാശിം അംല (56), ഫാഫ് ദു പ്ലസ്സിസ് (9), തെനിസ് ഡി ബ്രൂയിന്‍ (1), കോക്ക് (9). പാട് കമ്മിന്‍സ്, മിച്ചല്‍ മാര്‍ഷ് എന്നിവര്‍ രണ്ട് വിക്കറ്റ് വീതവും മിച്ചല്‍ സ്റ്റാര്‍ക്ക്, ജോഷ് ഹസ്‌ലേവുഡ്, നഥാന്‍ ലിയോണ്‍ എന്നിവര്‍ ഓരോ വിക്കറ്റ് വീതവും വീഴ്ത്തി.