സുല്‍ത്താന്‍ ബത്തേരി: കുടിവെള്ള ക്ഷാമം രൂക്ഷമായതോടെ സുല്‍ത്താന്‍ ബത്തേരി താലൂക്ക് ആയുര്‍വേദ ആശുപത്രിയുടെ പ്രവര്‍ത്തനം താളം തെറ്റുന്നു. ആശുപത്രി കോമ്പൗണ്ടിലെ കിണറ്റിലെ വെള്ളം താഴ്ന്നതും കുഴല്‍ക്കിണര്‍ വെള്ളം ഉപയോഗ്യശൂന്യമായതുമാണ് ബത്തേരി താലൂക്ക് ആയുര്‍വേദ ആശുപത്രിയുടെ പ്രവര്‍ത്തനത്തെ ബാധിച്ചത്.
കിണറ്റില്‍ നിന്ന് മാത്രമുള്ള വെള്ളം കൊണ്ടു ആശുപത്രിയുടെ പ്രവര്‍ത്തനവും രോഗികളുടെ ആവശ്യവും നിറവേറ്റാന്‍ തികയാത്ത അവസ്ഥയാണ്. 50 രോഗികളെ കിടത്തി ചികിത്സ നടത്തുന്ന ആശുപത്രിയില്‍ ഇപ്പോള്‍ 47 പേരാണ് അഡ്മിറ്റുള്ളത്. കഴിഞ്ഞ രണ്ടുദിവസമായി ആശുപത്രിയില്‍ വെള്ളക്ഷാമം അതിരൂക്ഷമാണ്. വെള്ളക്ഷാമത്തെ തുടര്‍ന്ന്് ആശുപത്രിയില്‍ കിടപ്പുരോഗികള്‍ പ്രാഥമിക ആവശ്യങ്ങള്‍ നിറവേറ്റാന്‍ അരകിലോമീറ്റര്‍ അകലെയുള്ള കെ.എസ്.ആര്‍.ടി.സി ഡിപ്പോയെയാണ് ആശ്രയിക്കുന്നത്.
വെള്ളക്ഷാമം രൂക്ഷമായതിനാല്‍ കിടത്തി ചികിത്സ വേണ്ടി വരുന്നവരെപോലും ആശുപത്രയില്‍ അഡ്മിറ്റ് ചെയ്യാനും അധികൃതര്‍ക്കാവുന്നില്ല. ആശുപത്രിയിലെ കുടിവെള്ള പ്രശ്‌നത്തിന് പരിഹാരം കാണണമെന്നാണ് ആശുപത്രിയില്‍ ചികിത്സയില്‍ കഴിയുന്ന രോഗികളുടെ ആവശ്യം. അതേ സമയം ആശുപത്രിയിലെ വെള്ളക്ഷാമം ബ്ലോക്ക് പഞ്ചായത്ത് അധികൃതരെ അറിയിച്ചിട്ടുണ്ടന്നും എത്രയും പെട്ടന്ന്് പ്രശ്്‌ന പരിഹാരം കാണുമെന്നും ആശുപത്രി അധികൃതര്‍ പറഞ്ഞു.