പന്തല്ലൂര്‍: തമിഴ്‌നാട് മൃഗ സംരക്ഷണ വകുപ്പ് സൗജന്യമായി നല്‍കിയ ആടുകള്‍ ചാകുന്നതായി പരാതി. തമിഴ്‌നാട് സര്‍ക്കാര്‍ മൃഗ സംരക്ഷണ വകുപ്പിന്റെ കീഴില്‍ ദാരിദ്ര രേഖക്ക് താഴെയുള്ളവര്‍, വിധവകള്‍, ഭര്‍ത്താവ് ഉപേക്ഷിച്ച സ്ത്രീകള്‍ എന്നിവര്‍ക്കാണ് സൗജന്യമായി ആടുകളെ വിതരണം ചെയ്തത്. ആദ്യഘട്ടത്തില്‍ ചേരങ്കോട് പഞ്ചായത്തിലെ 210 ഗുണഭോക്താക്കള്‍ക്കാണ് നാല് ആടുകളും കൂടു നിര്‍മാണത്തിനായി രണ്ടായിരം രൂപയും നല്‍കിയത്. തമിഴ്‌നാട്ടിലെ അണ്ണൂര്‍, അവിനാശി തുടങ്ങിയ പ്രദേശങ്ങളില്‍ നിന്നാണ് ആടുകളെ എത്തിച്ചത്. എന്നാല്‍ ഉഷ്ണമേഖല പ്രദേശങ്ങളില്‍ നിന്നെത്തിച്ച ആടുകള്‍ നീലഗിരിയിലെ തണുത്ത കാലാവസ്ഥയില്‍ അതിജീവനം സാധ്യമാകാതെയാണ് ചാകുന്നതെന്നാണ് പരാതി. ചേരങ്കോട് പഞ്ചായത്തിലെ ചന്തനമാക്കുന്ന് സ്വദേശികളായ ജ്യോതി, കൃഷ്ണ വേണി, ജയലക്ഷ്മി, കണ്ണന്‍വയല്‍ സ്വദേശി കന്തയ്യ എന്നിവരുടെ ഓരോ ആടുകളും പത്മാവതിയുടെ രണ്ട് ആടുകളുമാണ് ചത്തത്. മൃഗസംരക്ഷണ വകുപ്പ് പ്രതിരോധ പ്രവര്‍ത്തനങ്ങള്‍ ആരംഭിച്ചിട്ടുണ്ട്. ആടുകള്‍ ചത്ത് തുടങ്ങിയതോടെ ഗുണഭോക്താക്കള്‍ പ്രതിസന്ധിയിലായിരിക്കുകയാണ്.