കൊളംബോ: ശ്രീലങ്കന്‍ പേസ് ബൗളര്‍ നുവാന്‍ കുലശേഖര ടെസ്റ്റ് ക്രിക്കറ്റില്‍ നിന്ന് വിരമിച്ചു. ഇംഗ്ലണ്ടിനെതിരായ ടെസ്റ്റ് പരമ്പര ലങ്കന്‍ ടീമിന് നഷ്ടമായതിന് പിന്നാലെയാണ് താരത്തിന്റെ വിരമിക്കല്‍.
പരിമിത ഓവര്‍ മത്സരങ്ങളില്‍ ശ്രദ്ധകേന്ദ്രീകരിക്കുന്നതിനാണ് ടെസ്റ്റില്‍നിന്ന് വിരമിക്കുന്നതെന്ന് കുലശേഖര വ്യക്തമാക്കി. വിരമിക്കാനുള്ള തീരുമാനം ശ്രീലങ്കന്‍ ക്രിക്കറ്റ് ബോര്‍ഡിനയച്ച കത്തില്‍ താരം വ്യക്തമാക്കിയിട്ടുണ്ട്.
2005 ന്യൂസിലന്‍ഡിനെതിരേയായിരുന്നു കുലശേഖരയുടെ ടെസ്റ്റ് അരങ്ങേറ്റം. 21 ടെസ്റ്റുകളില്‍നിന്ന് 48 വിക്കറ്റുകളാണ് സമ്പാദ്യം. 2014ലാണ് താരം അവസാനമായി ലങ്കയ്ക്കു വേണ്ടി ടെസ്റ്റ് മത്സരം കളിച്ചത്. ഏകദിന-ടി20 മത്സരങ്ങളിലെ മികവ് ടെസ്റ്റില്‍ ആവര്‍ത്തിക്കാന്‍ താരത്തിനു സാധിച്ചിരുന്നില്ല. ഏകദിനത്തില്‍ 173 മത്സരങ്ങളില്‍നിന്ന് 186 വിക്കറ്റെടുക്കാന്‍ കുലശേഖരയ്ക്ക് സാധിച്ചിട്ടുണ്ട്.