തൊടുപുഴ: ഇടുക്കിയിലെ മാധ്യമരംഗത്തും പൊതുരംഗത്തും സജീവ സാന്നിധ്യമായിരുന്നു അകാലത്തില്‍ മണ്‍മറഞ്ഞ മാധ്യമ പ്രവര്‍ത്തകന്‍ കെ.പി. ഗോപിനാഥെന്ന് പി.ജെ. ജോസഫ് എം.എല്‍.എ അഭിപ്രായപ്പെട്ടു. നര്‍മബോധവും ഭാവനയും ചേര്‍ന്ന എഴുത്തിന്റെ രീതി അദ്ദേഹത്തിന്റെ പ്രത്യേകതകളിലൊന്നായിരുന്നുവെന്നും ഗോപിനാഥിന്റെ പേരിലെ മാധ്യമ പുരസ്‌കാരം വിതരണം ചെയ്തുകൊണ്ട് ജോസഫ് പറഞ്ഞു.
മുഖ്യപ്രഭാഷണവും അദേഹം നിര്‍വഹിച്ചു. മുതിര്‍ന്ന മാധ്യമ പ്രവര്‍ത്തകന്‍ എം.ജെ. ബാബു അനുസ്മരണ പ്രഭാഷണം നടത്തി. നാടിന്റെ വികസനത്തിലൂന്നി പത്രപ്രവര്‍ത്തനം നടത്തിയ വ്യക്തിയായിരുന്നു ഗോപിനാഥെന്നും തൊടുപുഴയെ വളര്‍ച്ചയിലേക്കെത്തിക്കുന്നതില്‍ അദ്ദേഹത്തിന്റെ തൂലിക വഹിച്ച പങ്ക് ചെറുതല്ലെന്നും ബാബു ചൂണ്ടിക്കാട്ടി. മാധ്യമ പ്രവര്‍ത്തകന്‍ മാത്രമല്ല ഒരു സാംസ്‌കാരിക പ്രവര്‍ത്തകന്‍ കൂടിയായിരുന്നു അദ്ദേഹമെന്നും അനുസ്മരിച്ചു.
10,000 രൂപയും ഫലകവുമടങ്ങുന്ന അവാര്‍ഡ് ദീപിക പാലക്കാട് ബ്യൂറോ ചീഫ് എം.വി. വസന്ത് പി.ജെ. ജോസഫില്‍ നിന്ന് ഏറ്റുവാങ്ങി. പ്രസ് ക്ലബ് പ്രസിഡന്റ് അഷ്‌റഫ് വട്ടപ്പാറ അധ്യക്ഷത വഹിച്ചു. സെക്രട്ടറി എം.എന്‍. സുരേഷ് സ്വാഗതവും എക്‌സിക്യൂട്ടീവ് അംഗം അഖില്‍ സഹായി നന്ദിയും പറഞ്ഞു.