തിരുവനന്തപുരം: ബി.ജെ.പി ദേശീയ നിര്‍വാഹക സമിതി അംഗം വി. മുരളീധരനെ മഹാരാഷ്ട്രയില്‍നിന്ന് മത്സരിപ്പിച്ച് രാജ്യസഭയില്‍ എത്തിക്കാനുള്ള ദേശീയ നേതൃത്വത്തിന്റെ തീരുമാനം സംസ്ഥാന ഘടകത്തിലെ ഗ്രൂപ്പ് പോര് കൂടുതല്‍ രൂക്ഷമാക്കും. ഗ്രൂപ്പ് പോരില്‍ ആടിയുലയുന്ന സംസ്ഥാന ഘടകത്തില്‍ വി. മുരളീധരന്‍ പക്ഷത്തിന് കരുത്ത് പകരുന്ന തീരുമാനമാണ് കേന്ദ്രനേതൃത്വം കൈക്കൊണ്ടത്. സമീപകാലത്ത് സംസ്ഥാന ഘടകത്തില്‍ ആധിപത്യം പുലര്‍ത്തിയ പി.കെ കൃഷ്ണദാസ് ഗ്രൂപ്പിനുള്ള അപ്രതീക്ഷിത തിരിച്ചടി കൂടിയായി ഇത്.
കുമ്മനം രാജശേഖരന്‍ സംസ്ഥാന പ്രസിഡന്റായതോടെ കൃഷ്ണദാസ് ഗ്രൂപ്പ് കൂടുതല്‍ ശക്തിപ്പെടുകയാണ് ചെയ്തിരുന്നത്. പിന്നീട് കുമ്മനവും കൃഷ്ണദാസും ഒരേചേരിയിലായി.
കുമ്മനത്തെ മുന്നില്‍നിര്‍ത്തി സംസ്ഥാന ഭാരവാഹികളില്‍ ഉള്‍പ്പെടെ മേല്‍കൈ നേടാന്‍ കൃഷ്ണദാസ് പക്ഷത്തിനായിരുന്നു. മെഡിക്കല്‍ കോളജ് കോഴ വിവാദത്തെ തുടര്‍ന്ന് കുറ്റക്കാര്‍ക്കെതിരേ നടപടിയെടുക്കാതെ, സംഭവം പുറത്തുവിട്ടു എന്നതിന്റെ പേരില്‍ മുരളീധര പക്ഷത്തെ ശക്തനായ വി.വി രാജേഷിനെ പാര്‍ട്ടി അംഗത്വത്തില്‍നിന്നു തന്നെ പുറത്താക്കാനും കൃഷ്ണദാസ് പക്ഷത്തിനായി. സംഘടനകളുടെ ചുമതല നിശ്ചയിച്ചപ്പോള്‍ കെ.സുരേന്ദ്രനെ യുവമോര്‍ച്ചയുടെ ചുമതലയില്‍നിന്നു ഒഴിവാക്കിയും കൃഷ്ണദാസ് പക്ഷം കരുത്ത് തെളിയിച്ചു. ഇതിനിടെയാണ് മുരളീധരന് രാജ്യസഭയിലേക്ക് നറുക്ക് വീഴുന്നത്.
ഘടകകക്ഷിയായ ബി.ഡി.ജെ.എസിന്റെ അധ്യക്ഷന്‍ തുഷാര്‍ വെള്ളാപ്പള്ളിക്ക് രാജ്യസഭാ സീറ്റ് ലഭിക്കുമെന്ന് പ്രതീക്ഷിച്ചിരുന്ന അവസരത്തിലാണ് അതേസമുദായക്കാരനായ മുരളീധരന് രാജ്യസഭയിലേക്കുള്ള പാത തുറന്നത്.