മറയൂര്‍: കഞ്ചാവ് പൊതികളുമായി മൂന്നു യുവാക്കള്‍ എക്‌സൈസിന്റെ പിടിയിലായി. ആലുവ ഇടത്തല നൊച്ചിമകരയില്‍ തുണ്ടിപ്പറമ്പില്‍ ശരത് സന്തോഷ് (20), ഇളംകുളം ഗാന്ധിനഗര്‍ ലക്ഷ്മി വിഹാറില്‍ ശ്രീനാഥ് (19), കണയണ്ണൂര്‍ ഇളമക്കര ചെട്ടിവീട്ടില്‍ സന്ദേശ് സാബു (20) എന്നിവരാണു പിടിയിലായത്. ഇവരില്‍ നിന്ന് 24 ഗ്രാം കഞ്ചാവ് കണ്ടെടുത്തു. ഇവര്‍ സഞ്ചരിച്ച രണ്ടു ബൈക്കുകളും കസ്റ്റഡിയില്‍ എടുത്തു.
കഴിഞ്ഞദിവസം വൈകിട്ട് അഞ്ചുമണിയോടെ മറയൂര്‍-ഉടുമലൈ സംസ്ഥാന പാതയില്‍ കരിമുട്ടിയില്‍ വച്ചാണു സഞ്ചാരികളായ ഇവരെ എക്‌സൈസ് സംഘം പിടികൂടിയത്. മൂന്നാര്‍ ടോപ്പ് സ്‌റ്റേഷന്‍ സന്ദര്‍ശിച്ചപ്പോള്‍ അവിടെ നിന്ന് ഒരു പൊതിക്ക് 300 രൂപയ്ക്കു വാങ്ങിയതാണിതെന്നാണു പിടിയിലായവര്‍ മൊഴി നല്‍കിയിരിക്കുന്നത്. മറയൂര്‍ അസിസ്റ്റന്റ് എക്‌സൈസ് ഇന്‍സ്‌പെക്ടര്‍ സുനില്‍ ആന്റോ, പ്രിവന്റീവ് ഓഫിസര്‍ അനു ബാബു, സിവില്‍ എക്‌സൈസ് ഓഫിസര്‍മാരായ ബൈജു, നിബിന്‍, ഉണ്ണിക്കൃഷ്ണന്‍ എന്നിവരുടെ നേതൃത്വത്തിലാണ് പ്രതികളെ പിടികൂടിയത്. പ്രതികളെ ദേവികുളം കോടതിയില്‍ ഹാജരാക്കി.