കാസര്‍കോട്: ബന്ധുവായ യുവാവ് കൊടുത്തയച്ച കഞ്ചാവുമായി വിദേശത്തേക്ക് ആദ്യമായി പോയ യുവാവ് പിടിയിലായി. കാസര്‍കോട് തെരുവത്ത് സ്വദേശിയായ കോയാസ് ലൈനിലെ നിഷാദ് (26)ആണ് ഖത്തറില്‍ പിടിയിലായി ജയിലില്‍ കഴിയുന്നത്. പത്തു ദിവസം മുന്‍പാണ് നിഷാദ് ബംഗളൂരുവില്‍ നിന്ന് ജോലി ആവശ്യാര്‍ഥം വിദേശത്തേക്ക് പോയത്.
നിഷാദ് യാത്ര തിരിക്കുമ്പോള്‍ തന്റെ ഖത്തറിലുള്ള സുഹൃത്തിനു നല്‍കാനെന്ന പേരില്‍ കാഞ്ഞങ്ങാട് കൊളവയലിലുള്ള ബന്ധുവാണ് കൈവശം കഞ്ചാവ് പൊതി ഏല്‍പ്പിച്ചത്രെ. വളരെ വിലകൂടിയ പൂക്കളാണെന്ന് വിശ്വസിപ്പിച്ചാണ് നിഷാദിന്റെ കൈയില്‍ പൊതി ഏല്‍പ്പിച്ചത്.
ഖത്തറില്‍ എത്തുമ്പോള്‍ തന്റെ സുഹൃത്ത് വന്ന് പൊതി വാങ്ങുമെന്നുമാണ് ഇയാള്‍ നിഷാദിനോട് പറഞ്ഞിരുന്നതെന്നു പറയുന്നു. ഖത്തറില്‍ വിമാനമിറങ്ങിയ നിഷാദ് താമസസ്ഥലത്തെത്തിയപ്പോഴേക്കും പിന്നാലെ ഖത്തര്‍ പൊലിസും പരിശോധനക്കെത്തി. തുടര്‍ന്ന് നിഷാദിന്റെ ബാഗ് പരിശോധിച്ച പൊലിസ് കഞ്ചാവ് പൊതി കണ്ടെത്തിയത്തോടെ അറസ്റ്റ് ചെയ്യുകയായിരുന്നു.
ബംഗളൂരുവില്‍ ഫാന്‍സി കട നടത്തി വന്നിരുന്ന നിഷാദ് കുടുംബത്തിന്റെ ഏക ആശ്രയമായിരുന്നു. നിഷാദ് ഖത്തറിലെത്തിയ വിവരം നാട്ടില്‍ ലഭിക്കാതെ വന്നതോടെ വീട്ടുകാര്‍ ബന്ധുവിനോട് കാര്യം തിരക്കിയെങ്കിലും നിഷാദ് സുഖമായി ഖത്തറില്‍ എത്തിയിട്ടുണ്ടെന്നും പിന്നീട് വീട്ടിലേക്കു വിളിക്കുമെന്ന മറുപടിയാണ് മാതാപിതാക്കള്‍ക്ക് ലഭിച്ചത്. പിന്നെയും ദിവസങ്ങള്‍ കഴിഞ്ഞിട്ടും വിളിക്കാതെ വന്നതോടെ നിഷാദിന്റെ മാതാപിതാക്കള്‍ തങ്ങള്‍ക്കറിയുന്ന ഖത്തറിലുള്ള മറ്റൊരാളുമായി ബന്ധപ്പെട്ടതോടെയാണ് ചതിയില്‍പെട്ട് മകന്‍ അവിടെ ജയിലില്‍ കഴിയുകയാണെന്ന വിവരം ലഭിച്ചത്.
ഇയാളെ ചതിയില്‍പ്പെടുത്തിയ ബന്ധുവിനെ നിഷാദിന്റെ സുഹൃത്തുക്കള്‍ മുംബൈയില്‍ നിന്ന് പിടികൂടി കാസര്‍കോട്ടെത്തിച്ചിട്ടുണ്ട്. നിഷാദിന്റെ നിരപരാധിത്വം തെളിയിക്കാനുള്ള ശ്രമത്തിലാണ് സുഹൃത്തുക്കളും ബന്ധുക്കളും.