കൊച്ചി: ജെറ്റ് എയര്‍വെയ്‌സ് രാജ്യത്ത് 144 പ്രതിവാര ആഭ്യന്തര സര്‍വിസുകള്‍ ആരംഭിക്കുന്നു.
വടക്കു കിഴക്കന്‍ സംസ്ഥാനങ്ങളെയും ന്യൂഡല്‍ഹിയെയും ബന്ധിപ്പിക്കുന്ന നേരിട്ടുള്ള സര്‍വിസുകള്‍ അടക്കം നിരവധി സവിശേഷതകളാണ് പുതിയ സമയ പട്ടികയിലുള്ളത്.
മുംബൈയെയും തിരുച്ചിറപ്പള്ളിയെയും ബന്ധിപ്പിക്കുന്ന നേരിട്ടുള്ള സര്‍വിസ്, തിരുച്ചിറപ്പള്ളിയെയും ന്യൂഡല്‍ഹിയെയും ബന്ധിപ്പിക്കുന്ന സര്‍വിസ്, ന്യൂഡല്‍ഹിയില്‍ നിന്ന് ഐസ്വാളിലേക്കും ജോര്‍ഹട്ടിലേക്കും ആഴ്ചയില്‍ മൂന്നു നേരിട്ടുള്ള സര്‍വിസുകള്‍ തുടങ്ങിയവയാണ് ആരംഭിക്കുന്നത്.
ഏതു പട്ടണത്തില്‍ നിന്നായാലും കുറഞ്ഞ സ്റ്റോപ്പുകളോടെ തുടര്‍ച്ചയായ കണക്ടിവിറ്റി ലഭ്യമാക്കുന്നതും വിവിധ കേന്ദ്രങ്ങളിലേക്കു യാത്ര ചെയ്യാന്‍ സഹായിക്കുന്നതുമാണ് വേനല്‍ക്കാലത്തേക്കായുള്ള പുതിയ സമയ പട്ടികയെന്ന് ജെറ്റ് എയര്‍വെയ്‌സിന്റെ നെറ്റ് വര്‍ക്ക് പ്ലാനിങ് ആന്‍ഡ് റവന്യൂ മാനേജ്‌മെന്റ് സീനിയര്‍ വൈസ് പ്രസിഡന്റ് രാജ് ശിവകുമാര്‍ പറഞ്ഞു.