കൊച്ചി: സ്വകാര്യ ആശുപത്രി ജീവനക്കാരുടെ മിനിമംവേതനം പുതുക്കിനിശ്ചയിക്കുന്നതിന്റെ ഭാഗമായി 19ന് ഉപദേശക സമിതി യോഗം ചേരുമെന്ന് മിനിമം വേജസ് അഡൈ്വസറി ബോര്‍ഡ് ചെയര്‍മാന്‍ പി.കെ ഗുരുദാസന്‍ അറിയിച്ചു. എറണാകുളം ടൗണ്‍ഹാളില്‍ സ്വകാര്യ ആശുപത്രി ജീവനക്കാരുടെ മിനിമംവേതനം സംബന്ധിച്ച് നടത്തിയ ആശുപത്രി മാനേജ്‌മെന്റുകളുടെ ഹിയറിങ്ങില്‍ സംസാരിക്കുകയായിരുന്നു അദ്ദേഹം.
മിനിമംവേതനം പുതുക്കിനിശ്ചയിക്കുന്നകാര്യത്തില്‍ ഉപദേശക സമിതി ശരിയായ തീരുമാനം കൈക്കൊള്ളും. ഇക്കഴിഞ്ഞ 13ന് തിരുവനന്തപുരം തൊഴില്‍ഭവനില്‍ ട്രേഡ് യൂനിയനുകളുടെ പരാതികളും ആക്ഷേപങ്ങളും സ്വീകരിച്ച് ഹിയറിങ് നടത്തിയിരുന്നു. സമിതിക്കുമുന്നില്‍ പരാതി നല്‍കിയവരെ കത്തയച്ചുവരുത്തി ഹിയറിങ് നടത്തുകയായിരുന്നു. എറണാകുളം ടൗണ്‍ഹാളില്‍ ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ നിന്നുള്ളവര്‍ക്കായി ഹിയറിങ് നടത്തി.
ഇന്ന് രാവിലെ 11ന് തിരുവനന്തപുരം തൊഴില്‍ഭവനില്‍ തിരുവനന്തപുരം, കൊല്ലം, പത്തനംതിട്ട, കോട്ടയം, ആലപ്പുഴ ജില്ലകളില്‍ നിന്നുള്ള സ്വകാര്യ ആശുപത്രി മാനേജ്‌മെന്റുകളുടെയും വ്യക്തിപരമായി പരാതി നല്‍കിയവരുടെയും ആക്ഷേപങ്ങള്‍ പരിഗണിച്ച് ഹിയറിങ് നടത്തും. ഹൈക്കോടതി ഉത്തരവിനെതിരായ ഒരുനടപടിക്കും മിനിമംവേതന ഉപദേശക സമിതി മുതിരില്ല. സമയബന്ധിതമായി റിപ്പോര്‍ട്ട് സര്‍ക്കാരിന് സമര്‍പ്പിക്കുമെന്നും അദ്ദേഹം പറഞ്ഞു.