കോട്ടയം: ജോസ് കെ മാണി എംപിയുടെ ഭാര്യ നിഷയുടെ 'ദി അദര്‍ സൈഡ് ഓഫ് ദിസ് ലൈഫ്' എന്ന പുസ്തകത്തിലെ പീഡനശ്രമ ആരോപണമുണ്ടാക്കിയ വിവാദം പുതിയ തലത്തിലേക്ക്.
തന്നെ സൂചിപ്പിക്കുന്ന തരത്തില്‍ അപകീര്‍ത്തികരമായ പരാമര്‍ശങ്ങള്‍ വെളിപ്പെട്ടതിനെക്കുറിച്ച് അന്വേഷിച്ച് നിജസ്ഥിതി പുറത്തുകൊണ്ടുവരണമെന്നാവശ്യപ്പെട്ട് കേരള യുവജനപക്ഷം സംസ്ഥാന ജനറല്‍ സെക്രട്ടറി കൂടിയായ അഡ്വ.ഷോണ്‍ ജോര്‍ജ് ഡി.ജി.പിക്കും കോട്ടയം എസ്.പിക്കും പരാതി നല്‍കി.
താന്‍ നിഷാ ജോസിനൊപ്പം തിരുവനന്തപുരത്തുനിന്ന് ട്രെയിനില്‍ യാത്രചെയ്യുകയോ അപമാനിക്കുകയോ ചെയ്തിട്ടില്ല. അവരുടെ പുസ്തകത്തിന്റെ പ്രചാരം വര്‍ധിപ്പിക്കണമെന്ന ലക്ഷ്യത്തോടെ നടത്തിയ പരാമര്‍ശങ്ങള്‍ തനിക്ക് പൊതുജനമധ്യത്തില്‍ അപമാനമുണ്ടാക്കി.
നിഷയുടെ പ്രവൃത്തികള്‍ ഇന്ത്യന്‍ ശിക്ഷാനിയമം 500, 501, 502 വകുപ്പുകള്‍ പ്രകാരം കുറ്റകരവും ശിക്ഷാര്‍ഹവുമാണെന്നും അതുകൊണ്ടുതന്നെ നിയമനടപടിയുമായി താന്‍ മുന്നോട്ടുപോവുമെന്നും ഷോണ്‍ ജോര്‍ജ് പരാതിയില്‍ പറയുന്നു. അതേസമയം ഷോണ്‍ ജോര്‍ജിന്റെ പരാതി അന്വേഷിക്കാനാകില്ലെന്ന് ഡി.ജി.പി ലോക്‌നാഥ് ബെഹ്‌റ. ഷോണ്‍ പരാതിയില്‍ ഉന്നയിച്ച വകുപ്പുകള്‍ പ്രകാരം അന്വേഷിക്കാനാവില്ലെന്നും ഡി.ജി.പി വ്യക്തമാക്കി.