ന്യൂഡല്‍ഹി: കോണ്‍ഗ്രസുമായി തെരഞ്ഞെടുപ്പ് സഹകരണം വേണ്ടെന്ന് അന്തിമമായി തീരുമാനിച്ച സാഹചര്യത്തിലും ചില നേതാക്കള്‍ ഇതുസംബന്ധിച്ച തര്‍ക്കം തുടരുകയാണെന്ന പ്രതീതി ജനങ്ങളിലുണ്ടാക്കാന്‍ ശ്രമിക്കുന്നുവെന്ന് സി.പി.എം പൊളിറ്റ് ബ്യൂറോയില്‍ വിമര്‍ശനം. കോണ്‍ഗ്രസുമായി സഖ്യം വേണ്ടെന്ന് തീരുമാനിച്ചതാണ്. കേന്ദ്രകമ്മിറ്റിയില്‍ വോട്ടെടുപ്പിലൂടെയാണ് ഇക്കാര്യത്തില്‍ അന്തിമ തീരുമാനമായത്. എന്നാല്‍ ഇപ്പോഴും ഇക്കാര്യത്തില്‍ കേന്ദ്ര നേതൃത്വത്തില്‍ തര്‍ക്കം തുടരുകയാണെന്ന പ്രതീതിയുണ്ടാക്കാന്‍ ചിലര്‍ ശ്രമിക്കുന്നുവെന്ന വിമര്‍ശനം കേരളാഘടകമാണ് ഉന്നയിച്ചത്. ഇത് നേതൃതലത്തില്‍ തര്‍ക്കവും വിഭാഗീയതയും ഇപ്പോഴും തുടരുകയാണെന്ന് വ്യാഖ്യാനിക്കപ്പെടുന്നതിനും കീഴ് ഘടകങ്ങളില്‍ ആശയകുഴപ്പത്തിനും കാരണമാകുന്നുണ്ടെന്നും കേരളാ ഘടകം വിമര്‍ശിച്ചു. ബി.ജെ.പിയെ പ്രതിരോധിക്കാന്‍ സമാനചിന്താഗതിക്കാരായ എല്ലാവരുമായും കൂട്ടുകൂടുമെന്ന് ഇന്നലെ കോണ്‍ഗ്രസ് പ്ലീനറി സമ്മേളനത്തില്‍ പ്രമേയം വന്ന ദിവസം തന്നെയാണ് കേരളാ ഘടകം ഈ വിമര്‍ശനം ഉന്നയിച്ചതും.
അതേസമയം, കോണ്‍ഗ്രസ് പ്ലീനറി പ്രമേയം അടുത്തമാസം നടക്കുന്ന പാര്‍ട്ടി സമ്മേളനത്തില്‍ ചര്‍ച്ച ചെയ്യുമെന്ന് ജനറല്‍ സെക്രട്ടറി സീതാറാം യെച്ചൂരി പറഞ്ഞു. പല പാര്‍ട്ടികളിലും പാസാക്കുന്ന പ്രമേയങ്ങള്‍ സി.പി.എമ്മില്‍ ചര്‍ച്ച ചെയ്യുന്നത് പതിവാണ്. ബി.എസ്.പിയും എസ്.പിയും തമ്മിലുള്ള സഖ്യം തുടരുകയാണെങ്കില്‍ അതിനെ സി.പി.എം പിന്തുണയ്ക്കുമെന്നും പി.ബി യോഗത്തിന് ശേഷം യെച്ചൂരി മാധ്യമപ്രവര്‍ത്തകരോടു പറഞ്ഞു. പൊതു തെരഞ്ഞെടുപ്പിന് ഇനിയും ഒരു വര്‍ഷം ബാക്കിയുണ്ടെന്നും അപ്പോള്‍ എന്തൊക്കെയാകുമെന്ന് ഇപ്പോള്‍ പ്രവചിക്കാനാവില്ലെന്നും അദ്ദേഹം കൂട്ടിച്ചേര്‍ത്തു.