പാലക്കാട്: വാളയാറില്‍ വന്‍ മയക്കുമരുന്നു വേട്ട. 40 കോടി രൂപവിലമതിക്കുന്ന ഹാഷിഷ് ഓയിലുമായി യുവാവിനെ എക്‌സൈസ് അറസ്റ്റ് ചെയ്തു. തൃശൂര്‍പേരൂര്‍ ഊരകം സ്വദേശി രാജേഷ്(47)നെയാണ് കാറില്‍ കടത്തിയ 36 കിലോ ഹാഷിഷ് ഓയിലുമായി പിടികൂടിയത്. ഇന്നലെ രാവിലെ സംസ്ഥാന അതിര്‍ത്തിയിലെ എക്‌സൈസിന്റെ പരിശോധനയിലാണ് കാര്‍ പിടിയിലായത്. ആന്ധ്രപ്രദേശില്‍ നിന്ന് എറണാകുളത്തേക്കാണ് ഇവ കൊണ്ടുപോയിരുന്നത്. കഞ്ചാവ് ലായനി രൂപത്തിലാക്കി മിശ്രിതം ചേര്‍ത്ത് ഹാഷിഷ് ഓയിലാക്കിയശേഷം പ്ലാസ്റ്റിക് കവറുകളില്‍പൊതിഞ്ഞു സൂക്ഷിച്ചാണ് കടത്തിയത്. അസി.കമ്മിഷണര്‍ എം.എസ്. വിജയന്റെ നേതൃത്വത്തിലുള്ള അന്വേഷണ സംഘം പ്രതിയെ കോടതിയില്‍ ഹാജരാക്കി റിമാന്‍ഡ്‌ചെയ്തു. അതിര്‍ത്തി വഴിയുള്ള മയക്ക് മരുന്ന് കഞ്ചാവ് വേട്ട തടയാന്‍ എക്‌സൈസ് പരിശോധനഊര്‍ജ്ജിതമാക്കിയിരുന്നു. അടുത്തിടെ സംസ്ഥാനത്ത് നടക്കുന്ന ഏറ്റവും വലിയ മയക്കുമരുന്ന് വേട്ടയാണിത്.