ന്യൂഡല്‍ഹി: ഓടിക്കൊണ്ടിരുന്ന തീവണ്ടിയില്‍ 16 കാരനായ മതവിദ്യാര്‍ഥി ജുനൈദ് ഖാന്‍ വിദ്വേഷകൊലപാതകത്തിനിരയായ സംഭവത്തില്‍ വിചാരണക്കോടതി നടപടികള്‍ സുപ്രിംകോടതി സ്‌റ്റേചെയ്തു. കൊലപാതകം സി.ബി.ഐക്കു വിടണമെന്ന ജുനൈദിന്റെ പിതാവ് ജലാലുദ്ദീന്റെ ആവശ്യം തള്ളിയ പഞ്ചാബ്- ഹരിയാനാ ഹൈക്കോടതി നടപടി ചോദ്യംചെയ്ത് നല്‍കിയ ഹരജി പരിഗണിക്കുകയായിരുന്നു സുപ്രിംകോടതി.
ജസ്റ്റിസുമാരായ കുര്യന്‍ ജോസഫ്, എം. ശാന്തന ഗൗഡര്‍ എന്നിവരടങ്ങുന്ന സുപ്രിംകോടതിയുടെ രണ്ടംഗബെഞ്ച ് സി ബി.ഐയുടെയും ഹരിയാനാ സര്‍ക്കാരിന്റെയും നിലപാട് തേടി.
ജുനൈദ് വധക്കേസില്‍ അന്വേഷണത്തിലും വിചാരണഘട്ടത്തിലുമുണ്ടായ അട്ടിമറി നീക്കങ്ങള്‍ ചൂണ്ടിക്കാട്ടിയാണ് കേസ് സി.ബി.ഐക്ക് വിടണമെന്ന് ജലാലുദ്ദീന്‍ ആവശ്യപ്പെട്ടത്. കേസ് കേവലം സീറ്റിന്റെ പേരിലുള്ള തര്‍ക്കം മാത്രമാക്കി ഒതുക്കിയ നടപടിയെയാണ് ഹരജിക്കാരന്‍ ചോദ്യംചെയ്തത്. മതസ്പര്‍ദ്ധ വളര്‍ത്തല്‍, നിയമ വിരുദ്ധമായി സംഘം ചേരല്‍, ക്രിമിനല്‍ ഗൂഢാലോചന, രാജ്യത്തിന്റെ അഖണ്ഡതക്കെതിരായി പ്രവര്‍ത്തിക്കല്‍ തുടങ്ങിയ ഗുരുതര വകുപ്പുകളൊന്നും തെളിയിക്കാന്‍ പോലിസിനു കഴിഞ്ഞിട്ടില്ലെന്നും ഹരജിയില്‍ ആരോപിച്ചിരുന്നു. വിചാരണക്കിടെ കേസിലെ മുഖ്യപ്രതി നരേഷ്‌കുമാറിന്റെ അഭിഭാഷകനെ സഹായിച്ച അഡീഷനല്‍ അഡ്വക്കേറ്റ് ജനറല്‍ നവീന്‍ കൗഷികിന്റെ നടപടിയും ജലാലുദ്ദീന്‍ ഹരജിയില്‍ ചൂണ്ടിക്കാട്ടി.
നേരത്തെ സി.ബി.ഐ അന്വേഷണം ആവശ്യപ്പെട്ട് ജുനൈദിന്റെ പിതാവ് നല്‍കിയ ഹരജി ഹൈക്കോടതി സിംഗിള്‍ ബെഞ്ച് തള്ളിയതോടെയാണ് അദ്ദേഹം ഡിവിഷന്‍ ബെഞ്ചിനെ സമീപിച്ചത്. നിലവില്‍ സംസ്ഥാന പൊലിസ് നല്ലനിലയില്‍ അന്വേഷിച്ചുവരുന്ന കേസ് ഏറ്റെടുക്കേണ്ടതില്ലെന്നും ഇതിനകം തന്നെ നിരവധി കേസിന്റെ ഭാരമുണ്ടെന്നുമുള്ള സി.ബി.ഐയുടെ നിലപാട് സിംഗിള്‍ ബെഞ്ച് അംഗീകരിക്കുകയായിരുന്നു.
എന്നാല്‍ ഇതേ നിലപാട് തന്നെ ഡിവിഷന്‍ ബെഞ്ചും സ്വീകരിച്ചതോടെ ഹരജിക്കാരന്‍ സുപ്രിംകോടതിയെ സമീപിക്കുകയായിരുന്നു. കഴിഞ്ഞ വര്‍ഷം ജൂലൈ 22ന് ചെറിയപെരുന്നാള്‍ ആഘോഷിക്കാനായി ഡല്‍ഹിയില്‍ നിന്ന് വസ്ത്രങ്ങളും മറ്റും വാങ്ങിവരുകയായിരുന്ന ജുനൈദിനെ തീവണ്ടിക്കുള്ളില്‍ വച്ച് കൊലപ്പെടുത്തിയ ശേഷം പുറത്തേക്കു വലിച്ചെറിയുകയായിരുന്നു.