കൊച്ചി: സാമൂഹിക നീതി വകുപ്പിന്റെ തിരിച്ചറിയല്‍ കാര്‍ഡ് ലഭിക്കുന്നതിനായി നടത്തുന്ന പരിശോധനകള്‍ സുപ്രിംകോടതി വിധിയുടെ ലംഘനമെന്ന് ട്രാന്‍സ്‌ജെന്‍ഡേഴ്‌സ് പ്രവര്‍ത്തകര്‍. ലിംഗാവസ്ഥ തെരഞ്ഞെടുക്കാനുള്ള വ്യക്തിയുടെ അവകാശത്തെ ചോദ്യം ചെയ്യുന്ന രീതിയാണ് സാമൂഹിക നീതിവകുപ്പ് ചെയ്യുന്നതെന്നും ഇവര്‍ വാര്‍ത്താ സമ്മേളനത്തില്‍ പറഞ്ഞു.
അതാത് ജില്ലകളിലുള്ള ട്രാന്‍സ്‌ജെന്‍ഡര്‍ ജസ്റ്റിസ് ബോര്‍ഡുകള്‍ക്ക് കീഴില്‍ ജില്ലാമെഡിക്കല്‍ ഓഫിസര്‍ തലവനാകുന്ന സമിതിയാണ് പരിശോധന നടത്തുന്നത്. ഇത് ട്രാന്‍സ്‌ജെന്‍ഡര്‍ സമൂഹത്തിന്റെ അന്തസിനെ ചോദ്യം ചെയ്യുന്ന നടപടിയാണ്.
മുന്‍പ് നടത്തിയ ട്രാന്‍സ് ജെന്‍ഡര്‍ സര്‍വേ പുനഃപരിശോധിക്കണമെന്നും അവകാശ സംരക്ഷണത്തിന് നിയമം നിര്‍മിക്കണമെന്നും അവര്‍ ആവശ്യപ്പെട്ടു. ഫൈസല്‍ ഫൈസു, രഞ്ജുമോള്‍ മോഹന്‍ വൈക്കം, അതിഥി അച്ചു, അവന്തിക വിഷ്ണു തുടങ്ങിയവര്‍ പങ്കെടുത്തു.