മാഡ്രിഡ്: കരിയറിലെ 50-ാം ഹാട്രിക്ക് ഗോള്‍ തികച്ച് റയല്‍ മാഡ്രിഡിന്റെ സൂപ്പര്‍ താരം ക്രിസ്റ്റ്യാനോ റൊണാള്‍ഡോ. ജിറോണയ്‌ക്കെതിരായ സ്പാനിഷ് ലാ ലിഗ പോരാട്ടത്തില്‍ ഹാട്രിക്കടക്കം നാല് ഗോളുകള്‍ നേടിയാണ് താരം അപൂര്‍വ റെക്കോര്‍ഡിലെത്തിയത്. റയലിനായി വിവിധ മത്സരങ്ങളില്‍ ക്രിസ്റ്റ്യാനോ നേടുന്ന 44-ാം ഹാട്രിക്കാണിത്. പോര്‍ച്ചുഗലിനായി അഞ്ചും മാഞ്ചസ്റ്റര്‍ യുനൈറ്റഡിനായി ഒരു ഹാട്രിക്കും താരം വലയിലാക്കി. ഈ സീസണില്‍ റയലിന് വേണ്ടി ക്രിസ്റ്റ്യാനോ 37 ഗോളുകള്‍ നേടി.
ലാ ലിഗയില്‍ ഏറ്റവും കൂടുതല്‍ ഹാട്രിക്ക് നേടുന്ന താരമെന്ന റെക്കോര്‍ഡ് നേരത്തെ തന്നെ സ്വന്തമാക്കിയിട്ടുള്ള ക്രിസ്റ്റ്യാനോ നേട്ടം 34ല്‍ എത്തിച്ചു. നാല് ഗോള്‍ നേട്ടത്തോടെ ലാ ലിഗയിലെ ടോപ് സ്‌കോറര്‍ പദവിക്കായുള്ള മത്സരവും മുറുകി.
ബാഴ്‌സലോണയുടെ ലയണല്‍ മെസ്സി 25 ഗോളുകളുമായി മുന്നില്‍ നില്‍ക്കുമ്പോള്‍ ഒറ്റയടിക്ക് നാല് ഗോള്‍ നേട്ടത്തോടെ ക്രിസ്റ്റ്യാനോ 22 ഗോളുകള്‍ തികച്ച് രണ്ടാം സ്ഥാനത്തേക്ക് കയറുകയും ചെയ്തു. 21 ഗോളുകളുമായി ലൂയീസ് സുവാരസും ഇവര്‍ക്കൊപ്പം രംഗത്തുണ്ട്.