പെരിന്തല്‍മണ്ണ: എം.ഇ.എ എന്‍ജിനിയറിങ് കോളജ് ഓഡിറ്റോറിയം ഇന്നലെ സാക്ഷ്യംവഹിച്ചതു മംഗല്യ മാമാങ്കത്തിന്. കോളജ് യൂനിയന്റെ നേതൃത്വത്തിലാണ് മെഹര്‍-18 എന്ന പേരില്‍ സമൂഹ വിവാഹം സംഘടിപ്പിച്ചത്. ആഡംബരവും ധൂര്‍ത്തും ഒഴിവാക്കി സുമനസുകളുടെ സഹായത്തോടെ ഒരുപറ്റം യുവതീ യുവാക്കള്‍ പുതുജീവിതത്തിലേക്കു നടന്നുകയറി.

തുടര്‍ച്ചയായി മൂന്നാം വര്‍ഷമാണ് ഈ കലാലയം സമൂഹ വിവാഹത്തിനു വേദിയാകുന്നത്. പരിപാടി കോളജ് ജനറല്‍ സെക്രട്ടറി പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്തു. മുനവ്വറലി ശിഹാബ് തങ്ങള്‍ അധ്യക്ഷനായി. മലപ്പുറം, കോഴിക്കോട്, വയനാട്, തൃശൂര്‍, പാലക്കാട് ജില്ലകളില്‍നിന്നു തെരഞ്ഞെടുക്കപ്പെട്ട നിര്‍ധനരായ 12 യുവതീ യുവാക്കളാണ് വിവാഹിതരായത്. കഴിഞ്ഞ വര്‍ഷങ്ങളില്‍ 10 യുവ മിഥുനങ്ങള്‍ക്കാണ് കോളജില്‍ മംഗല്യമൊരുക്കിയിരുന്നത്. ഇതോടെ മൂന്നുവര്‍ഷത്തിനിടെ 22 ജോഡി യുവതീ യുവാക്കള്‍ സമൂഹവിവാഹത്തിലൂടെ ഒന്നായി.

ഓരോ വധുവിനും എട്ടു പവന്‍ സ്വര്‍ണാഭരണങ്ങളും വരനും വധുവിനുമുള്ള വിവാഹവസ്ത്രങ്ങളും കോളജ് നല്‍കി. ഹൈന്ദവ ജോഡികളും പ്രമുഖ ഇസ്‌ലാമിക പണ്ഡിതരുടെ അനുഗ്രഹത്തില്‍തന്നെ വിവാഹിതരായി. സമസ്ത ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍, എം.പിമാരായ പി.വി അബ്ദുല്‍ വഹാബ്, പി.കെ കുഞ്ഞാലിക്കുട്ടി, എം.എല്‍.എമാരായ പി. അബ്ദുല്‍ ഹമീദ്, ആബിദ് ഹുസൈന്‍ തങ്ങള്‍, വി.കെ ഇബ്രാഹീം കുഞ്ഞ് എന്നിവരും അബ്ദുസമദ് പൂക്കോട്ടൂര്‍, അബ്ദുസ്സമദ് സമദാനി, വി. ശശികുമാര്‍ തുടങ്ങിയവരും സന്നിഹിതരായി.

സംഗമത്തിന് അധ്യാപകരായ വി.പി ശംസുദ്ദീന്‍, മെഹ്ബൂബലി, വിദ്യാര്‍ഥി യൂനിയന്‍ ചെയര്‍മാന്‍ അനീസ് മുഹമ്മദ്, അസ്ഹറുദ്ദീന്‍, സഹിയാന്‍, ഷാലിഖ് നേതൃത്വം നല്‍കി.