റിയാദ്: ഗള്‍ഫ് മേഖലയില്‍ ഉരുണ്ടുകൂടിയ ഖത്തര്‍ പ്രതിസന്ധിയില്‍ അയവു വരില്ലെന്ന സൂചന നല്‍കി ഖത്തര്‍ വിരുദ്ധ രാജ്യങ്ങള്‍.

കൈറോയില്‍ കഴിഞ്ഞ ദിവസം നടത്തിയ വാര്‍ത്താ സമ്മേളനത്തില്‍ ചതുര്‍ രാഷ്ട്ര സഖ്യത്തിലെ ഈജിപ്തും യു എ ഇയുമാണ് നിലപാട് വ്യക്തമാക്കിയത്. ഖത്തര്‍ പ്രതിസന്ധി പരിഹരിക്കുന്നതിനു ചതുര്‍രാഷ്ട്ര ങ്ങളായ ഈജിപ്ത്, ബഹ്‌റൈന്‍, സഊദി അറേബ്യ, യു എ ഇ എന്നീ രാജ്യങ്ങള്‍ മുന്നോട്ടു വെച്ച പതിമൂന്നു ഉപാധികളില്‍ ഉറച്ചു നില്‍ക്കുന്നതായും യാതൊരു വിട്ടു വീഴ്ച്ചക്കും തയ്യാറല്ലെന്നും ഈജിപ്ഷ്യന്‍ വിദേശ കാര്യ മന്ത്രി സാമിഹ് ശുക്‌രി, യു എ ഇ വിദേശ കാര്യ മന്ത്രി ശൈഖ് അബ്ദുല്ല ബിന്‍ സായിദ് അല്‍ നഹ്‌യാനും കൈറോയില്‍ നടത്തിയ വാര്‍ത്താ സമ്മേളനത്തില്‍ വ്യക്തമാക്കി.

സഊദി കിരീടാവകാശി നടത്തുന്ന അമേരിക്കന്‍ സന്ദര്‍ശനത്തില്‍ യു എസ് പ്രസിഡന്റ് ഡൊണാള്‍ഡ് ട്രംപ് നടത്തുന്ന ചര്‍ച്ചയോടെ ഖത്തര്‍ പ്രശ്‌നം പരിഹരിക്കപ്പെടുമെന്ന വാര്‍ത്തകള്‍ക്കിടെയാണ് സഖ്യരാജ്യങ്ങളുടെ പ്രതികരണം.

സഖ്യരാജ്യങ്ങള്‍ നല്‍കിയ ഉപാധികള്‍ ഖത്തര്‍ അംഗീകരിക്കണം, സഖ്യ രാജ്യങ്ങളുടെ ബന്ധത്തിന് കോട്ടം തട്ടുന്ന പ്രവര്‍ത്തനങ്ങളില്‍ നിന്നും ഖത്തര്‍ പിന്തിരിയണം, അറബ് രാജ്യങ്ങള്‍ തമ്മില്‍ നടത്തുന്ന ചര്‍ച്ചകളില്‍ ഖത്തര്‍ പ്രതിസന്ധിക്ക് കാര്യമായ സ്ഥാനം നല്‍കുന്നില്ല- ഇവര്‍ പറഞ്ഞു. ഖത്തര്‍ പ്രതിസന്ധി പരിഹരിക്കുന്നതിനെ കുറിച്ച് അധികം വൈകാതെ ചര്‍ച്ചകള്‍ നടക്കുമോയെന്ന ചോദ്യത്തിന് ഇതേ കുറിച്ച് തനിക്കറിയില്ലെന്നും ഈജിപ്ഷ്യന്‍ വിദേശ കാര്യ മന്ത്രി പ്രതികരിച്ചു. നിലവില്‍ സഊദിയും ഈജിപ്തും യു എ യും തമ്മിലുള്ള ബന്ധം കൂടുതല്‍ മേഖലയിലേക്ക് ശക്തമായി വരുന്നതായും ഇരുവരും പറഞ്ഞു.