ബംഗളൂരു: തെരഞ്ഞെടുപ്പിന് മുന്നോടിയായി കര്‍ണാടകയില്‍ സജീവമാവാന്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. ഇതിന്റെ ഭാഗമായി അദ്ദേഹം മംഗളൂരുവിലെത്തി. ദക്ഷിണ കന്നഡ, ഉടുപ്പി ജില്ലകളില്‍ രണ്ടു ദിവസത്തെ പര്യടനത്തിനാണ് അദ്ദേഹം എത്തിയത്.


നൂറ്റാണ്ടുകള്‍ പഴക്കമുള്ള ശൃംഗേരി ശാരദ പീഠവും അദ്ദേഹം സന്ദര്‍ശിക്കും. ചരിത്രത്തിന്റെ ആവര്‍ത്തനമായാണ് ഈ സന്ദര്‍ശനത്തെ ചരിത്രകാരന്‍മാര്‍ വിലയിരുത്തുന്നത്. 1978ല്‍ കോണ്‍ഗ്രസും ഇന്ദിരയും തകര്‍ന്നെന്ന് രാഷ്ട്രീയ ലോകം മുഴുവന്‍ വിധിയെഴുതിയ സമയത്ത്
ഇന്ദിരാ ഗാന്ധി ശാരദാ മഠത്തിലെത്തിയിരുന്നു. അവസാന പിടിവള്ളിയായി ചിക്മംഗളൂരില്‍ ലോക്‌സഭാ തെരഞ്ഞെടുപ്പില്‍ മത്സരിക്കുമ്പോഴാണ് അനുഗ്രഹം തേടി ഇന്ദിര ഇവിടെ എത്തിയത്.


അടിയന്തരാവസ്ഥ സമ്മാനിച്ച കനത്ത പരാജയത്തിന്റെ ഭാരവും തോളിലേറി നടക്കുന്ന ഇന്ദിര അന്ന് ഒരു എം.പി പോലുമായിരുന്നില്ല. വ്യക്തിപരമായ പ്രശ്‌നങ്ങളും അലട്ടുന്നുണ്ടായിരുന്നു അവരെ. പോരാത്തതിന് മൊറാര്‍ജിയുടെ ജനത സര്‍ക്കാര്‍ കോണ്‍ഗ്രസ് പ്രവര്‍ത്തകരെ വേട്ടയാടുന്നു. മാധ്യമങ്ങള്‍ കോണ്‍ഗ്രസിന്റെ മരണമാഘോഷിക്കുന്നു. കോണ്ഡഗ്രസ് എന്ന മുങ്ങുന്ന കപ്പലില്‍ നിന്ന് പല മുതിര്‍ന്ന നേതാക്കളും രക്ഷപ്പെടുന്നു. ഇതായിരുന്നു അന്നത്തെ അവസ്ഥ.


ഡി ദേവരാജ ഉര്‍സ് ആയിരുന്നു അന്ന് കര്‍ണാടക മുഖ്യമന്ത്രി. ഇന്ത്യന്‍  നാഷണല്‍  കോണ്‍ഗ്രസ്  പിളര്‍ന്നപ്പോള്‍ അദ്ദേഹം ഇന്ധിരാഗാന്ധിയുടെ കൂടെ നിലയുറപ്പിച്ചു. അദ്ദേഹമായിരുന്നു ഇന്ദിരയുടെ ഏക ആശ്വാസം. ചരിത്രം ഇവിടെ ആവര്‍ത്തിക്കുന്നതായി നിരീക്ഷകര്‍ തീര്‍ത്തും പ്രക്ഷുബ്ധമായ രാഷ്ട്രീയാന്തരീക്ഷം. പിടിവള്ളിയായി അതേ കര്‍ണാടക. ആശ്വാസമായി കോണ്‍ഗ്രസ് മന്ത്രസഭയും സിദ്ധരാമയ്യയും. രണ്ടു പേരും മൈസൂരില്‍ നിന്നുള്ളവരാണെന്നതും ശ്രദ്ധേയം.

കര്‍ണാടകയിലെ പ്രചാരണം ശക്തമാക്കാനാണ് രാഹുലിന്റെ നീക്കം. യു.പിയില്‍ ഉള്‍പെടെ തിരിച്ചടി നേരിട്ട ബി.ജെപിയെ തകര്‍ക്കുകയാണ് ലക്ഷ്യമെന്ന് കോണ്‍ഗ്രസ് അധ്യക്ഷന്‍ പറയുന്നു.