ഹൈദരാബാദ്: ദക്ഷിണ മേഖലാ വനിതാ ടി20 പോരാട്ടത്തില്‍ കേരളത്തിന് വിജയം. 18 റണ്‍സിന് കേരളത്തിന്റെ വനിതകള്‍ ഗോവയെ പരാജയപ്പെടുത്തി. ആദ്യം ബാറ്റ് ചെയ്ത കേരളത്തെ 20 ഓവറില്‍ ഒന്‍പത് വിക്കറ്റ് നഷ്ടത്തില്‍ വെറും 81 റണ്‍സില്‍ പുറത്താക്കാന്‍ ഗോവയ്ക്ക് സാധിച്ചെങ്കിലും അനായാസ വിജയത്തിലേക്ക് ബാറ്റേന്തിയ അവരെ 19.4 ഓവറില്‍ 63 റണ്‍സില്‍ എറിഞ്ഞിട്ടാണ് കേരളം വിജയം പിടിച്ചെടുത്തത്. നാലോവറില്‍ 13 റണ്‍സ് വഴങ്ങി മൂന്ന് വിക്കറ്റെടുത്ത അനീന മാത്യൂസിന്റെ മാരക ബൗളിങാണ് ഗോവയെ കുഴക്കിയത്. ക്യാപ്റ്റന്‍ സജന 3.4 ഓവറില്‍ ഏഴ് റണ്‍സ് മാത്രം വഴങ്ങി രണ്ട് വിക്കറ്റെടുത്ത് അനീനയെ പിന്തുണച്ചു. ജിപ്‌സ ജോസഫ്, മിന്നു മണി എന്നിവര്‍ ഓരോ വിക്കറ്റും വീഴ്ത്തി. 18 റണ്‍സെടുത്ത തേജസ്വിനി ദുര്‍ഗദാണ് ഗോവയുടെ ടോപ് സ്‌കോറര്‍. ടോസ് നേടി ബാറ്റിങ് തിരഞ്ഞെടുത്ത കേരളത്തിനായി മിന്നും മണി 23 റണ്‍സെടുത്ത് ടോപ് സ്‌കോററായി. സജന 18ഉം ദൃശ്യ 13ഉം അക്ഷയ 12ഉം റണ്‍സെടുത്തു. മറ്റൊരാളും രണ്ടക്കം കടന്നില്ല.