മഞ്ചേരി: ഗവ. മെഡിക്കല്‍കോളജിന് മുന്‍വശത്തെ മരുന്നു കടക്കരികില്‍നിന്നും കുട്ടിയുടെ സ്വര്‍ണവള കവര്‍ന്ന പ്രതിയെ മഞ്ചേരി പൊലിസ് അറസ്റ്റ് ചെയ്തു. പൂക്കോട്ടൂര്‍ പള്ളിപ്പടി പൂനൂര്‍ ഹൗസില്‍ ജംഷാദ് (35) ആണ് അറസ്റ്റിലായത്. ചൊവ്വാഴ്ച രാവിലെ മെഡിക്കല്‍ സ്റ്റോറിന് മുന്നില്‍ മാതാവിന്റെ തോളത്തിരുന്ന ഒന്നരവയസുളള കുട്ടിയുടെ നാലുഗ്രാം തൂക്കമുളള വളയാണ് ജംഷാദ് കവര്‍ന്നത്. കവര്‍ച്ച നടത്തിയ ശേഷം ഇയാള്‍ ഓടി രക്ഷപ്പെടുകയായിരുന്നു. സംഭവം നടന്ന ഉടന്‍ തന്നെ പരിസരത്തുണ്ടായിരുന്നവര്‍ ഇയാളുടെ പിന്നാലെ ഓടിയെങ്കിലും പിടികൂടാനായില്ല. പിന്നീട് കടയുടെ മുന്നിലുണ്ടായിരുന്ന സി.സി.ടി.വിയിലെ മോഷണത്തിന്റെ ദൃശ്യങ്ങളില്‍നിന്നാണ് പ്രതിയെ തിരിച്ചറിഞ്ഞത്. കുട്ടിയുടെ കൈയില്‍നിന്നും സ്വര്‍ണാഭരണം മോഷ്ടിക്കുന്ന ദൃശ്യം പിന്നീട് വാട്ട്‌സ്ആപ്പ് വഴി വ്യാപകമായി പ്രചരിക്കുകയും ചെയ്തിരുന്നു.
എസ്.ഐ നസീറുദ്ദീന്‍, എ.എസ്.ഐ നാസര്‍ എന്നിവരുടെ നേതൃത്വത്തിലാണ് ജംഷാദിനെ അറസ്റ്റുചെയ്തത്.