ന്യൂഡല്‍ഹി: ആധാര്‍ വിവരങ്ങള്‍ അതീവ സുരക്ഷിതമാണെന്നും പ്രപഞ്ചം നിലനില്‍ക്കുവോളം വിവരങ്ങള്‍ ചോര്‍ത്തുക സാധ്യമല്ലെന്നും കേന്ദ്രസര്‍ക്കാര്‍ സുപ്രിം കോടതിയെ അറിയിച്ചു. രഹസ്യകോഡുകള്‍ ഉപയോഗിച്ചാണ് വിവരങ്ങള്‍ സൂക്ഷിച്ചിരിക്കുന്നത്. ബയോമെട്രിക് വിവരങ്ങള്‍ പുറത്തുപോകാത്ത തരത്തിലുള്ള രഹസ്യകോഡാണിത്. പ്രപഞ്ചം നിലനില്‍ക്കുന്ന കാലത്തോളം ഇവയും നിലനില്‍ക്കും. അതുകൊണ്ട് ഇതിലെ വിവരങ്ങള്‍ ചോര്‍ത്തുകയെന്നത് അസാധ്യമാണെന്നും സര്‍ക്കാര്‍ അറിയിച്ചു. ആധാര്‍ കേസില്‍ അഞ്ചംഗഭരണഘടനാ ബെഞ്ച് മുമ്പാകെ വാദംകേള്‍ക്കുന്നതിനിടെ ആധാര്‍ സംവിധാനം നടപ്പാക്കുന്ന യു.ഐ.ഡി.ഐ സി.ഇ.ഒ അശോക് ഭൂഷണ്‍ പാണ്ഡെയാണ് ഇക്കാര്യം അറിയിച്ചത്. സുപ്രിം കോടതിയുടെ പ്രത്യേക അനുമതിയോടെ അദ്ദേഹം ആധാറിന്റെ സുരക്ഷാസംവിധാനങ്ങള്‍ വിശദീകരിക്കുകയും ചെയ്തു. ആധാര്‍കാര്‍ഡിന്റെ ഭരണഘടനാസാധുത ചോദ്യം ചെയ്തുള്ള ഹരജികളിന്‍മേലാണ് സുപ്രിം കോടതിയില്‍ വാദം നടക്കുന്നത്.
ആധാര്‍ ബയോമെട്രിക് മാച്ചിങ് സോഫ്റ്റ്‌വെയര്‍ വാങ്ങിയത് വിദേശ കമ്പനിയില്‍ നിന്നാണ്. സോഫ്റ്റ്‌വെയര്‍ വിദേശ കമ്പനിയുടേതാണെങ്കിലും ആധാര്‍ വിവരങ്ങള്‍ വിദേശ കമ്പനിക്ക് ലഭിക്കില്ല. ആധാറിന്റെ സോഫ്റ്റ്‌വെയര്‍ ഉപയോഗിക്കുന്ന സെര്‍വര്‍ ഇന്ത്യയുടേതാണ്. ദേശീയ സുരക്ഷയുടെ പേരില്‍ ഇതുവരെ വിവരങ്ങള്‍ കൈമാറിയിട്ടില്ല. ജില്ലാ ജഡ്ജിയുടെ ഉത്തരവുണ്ടെങ്കില്‍ ആധാര്‍ വിവരങ്ങള്‍ കൈമാറാനാണ് തീരുമാനം. ആധാര്‍ വന്നതോടെ പൂഴ്ത്തിവയ്പും കരിച്ചന്തയും കുറഞ്ഞുവെന്നു അവകാശപ്പെട്ട പാണ്ഡെ, സാങ്കേതിക തകരാറുകള്‍ കാരണം ബയോമെട്രിക് വിവരങ്ങള്‍ ശേഖരിക്കുന്നതില്‍ പിഴവുകള്‍ ഉണ്ടായിട്ടുണ്ടെന്നും സമ്മതിച്ചു.
വാദത്തിനിടെ ആധാര്‍ കാര്‍ഡ് ബാങ്ക് അക്കൗണ്ടുമായി ബന്ധിപ്പിച്ചില്ലെന്ന കാരണത്താല്‍ വിരമിച്ച സര്‍ക്കാര്‍ ജീവനക്കാരനു പെന്‍ഷന്‍ നിഷേധിക്കാന്‍ കഴിയുമോയെന്നു കോടതി ആരാഞ്ഞിരുന്നു. ജീവനക്കാരന്‍ നേരിട്ടു കൈകാര്യം ചെയ്യുന്നതു കൊണ്ടുതന്നെ വ്യാജപെന്‍ഷന്‍ അക്കൗണ്ടുകള്‍ എങ്ങനെ തടയുമെന്നും ഭരണഘടനാ ബെഞ്ച് ചോദിച്ചു. ഇതോടെ ആധാര്‍ വിവരങ്ങള്‍ സുരക്ഷിതമാണെന്നും കോടതിയില്‍ പവര്‍പോയിന്റ് അവതരണത്തിലൂടെ അതു തെളിയിക്കാമെന്നും സര്‍ക്കാരിനു വേണ്ടി ഹാജരായ അറ്റോര്‍ണി ജനറല്‍ കെ.കെ വേണുഗോപാല്‍ അറിയിച്ചു. ഇതിനു പിന്നാലെയാണ് ഉച്ചയ്ക്ക് രണ്ടിന് അസാധാരണ നടപടിയായി പവര്‍പോയിന്റ് അവതരണത്തിലൂടെ അക്കാര്യങ്ങള്‍ വിശദമാക്കാന്‍ കോടതി സര്‍ക്കാരിനെ അനുവദിച്ചത്. ഇതിനായി പ്രത്യേകസംവിധാനവും സ്‌ക്രീനും സ്ഥാപിച്ച് യു.ഐ.ഡി.ഐ സി.ഇ.ഒ വിശദീകരിച്ചു.