മലപ്പുറം: ദേശീയപാത വികസനവുമായി ബന്ധപ്പെട്ട ഭൂമിയുടെയും മറ്റും നഷ്ടപരിഹാരം നിശ്ചയിക്കുന്നതു 2013ലെ ഭൂമി എറ്റെടുക്കലും പുനരധിവാസവും നിയമപ്രകാരമാണെന്നു ജില്ലാ കലക്ടര്‍ അമിത് മീണ. 1956ലെ ദേശീയപാത ആക്ട് പ്രകാരമാണ് ഭൂമിക്കു വില നല്‍കുന്നതെന്ന പ്രചാരണം അടിസ്ഥാനരഹിതമാണന്നും അദ്ദേഹം അറിയിച്ചു.
1956ലെ ദേശീയപാത ആക്ട് പ്രകാരമാണ് ഭൂമി ഏറ്റെടുക്കുന്ന നടപടികള്‍ പൂര്‍ത്തിയാക്കുന്നതിനു നിര്‍ദേശിച്ചിട്ടുള്ളത്. അതു പ്രകാരമുള്ള പ്രവര്‍ത്തനങ്ങളാണ് ഇപ്പോള്‍ നടക്കുന്നത്. ഇതുസംബന്ധിച്ച വിശദാംശങ്ങള്‍ പൊതുജനങ്ങളുടെ അറിവിലേക്കായി നേരത്തെ പ്രസിദ്ധീകരിച്ചതാണെന്നും കലക്ടര്‍ ചൂണ്ടിക്കാട്ടി.
അതേസമയം, സര്‍വേയുടെ കാര്യത്തില്‍ ജില്ലയിലെ പ്രമുഖ രാഷ്ട്രീയ പാര്‍ട്ടികള്‍ നിലപാട് വ്യക്തമാക്കണമെന്ന് എന്‍.എച്ച് ആക്ഷന്‍ കൗണ്‍സില്‍ ജില്ലാ കണ്‍വീനര്‍ അബുലൈസ് തേഞ്ഞിപ്പലം, എന്‍.എച്ച് സംരക്ഷണ സമിതി ജില്ലാ കണ്‍വീനര്‍ പി.കെ പ്രദീപ് മേനോന്‍ എന്നിവര്‍ ആവശ്യപ്പെട്ടു. 2013ലെ ഭൂമിയേറ്റെടുപ്പ് നിയമത്തിന്റെ അടിസ്ഥാനത്തില്‍ ബാധിക്കപ്പെടുന്നവര്‍ക്കു പുനരധിവാസവും വിപണി വിലയും നല്‍കുമെന്ന് ഇരകളെ തെറ്റിദ്ധരിപ്പിച്ചു ഭൂമിയും കിടപ്പാടവും അളന്നെടുക്കുകയാണെന്നു ഭാരവാഹികള്‍ ആരോപിച്ചു.