തിരുവനന്തപുരം: ടി.പി ചന്ദ്രശേഖരന്‍ വധക്കേസിലെ പ്രതി പികെ കുഞ്ഞനന്തനെ മോചിപ്പിക്കാനുള്ള സര്‍ക്കാര്‍ നീക്കത്തിനെതിരെ രൂക്ഷ വിമര്‍ശനവുമായി പ്രതിപക്ഷം. നടപടിയല്‍ പ്രതിഷേധിച്ച് പ്രതിപക്ഷം നിയമസഭയില്‍നിന്ന് ഇറങ്ങിപ്പോയി.

സര്‍ക്കാര്‍ നീക്കത്തെ നിയമപരമായി നേരിടുമെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. കുഞ്ഞനന്തനെ മോചിപ്പിക്കാനുള്ള നീക്കം സത്യപ്രതിജ്ഞാ ലംഘമാണെന്ന് പ്രതിപക്ഷ നേതാവ് രമേശ് ചെന്നിത്തല പത്രസമ്മേളനത്തില്‍ ആരോപിച്ചു. 'പ്രതിപക്ഷത്തിന്റെ ആരോപണത്തിനു നേരെ മുഖ്യമന്ത്രി സ്വീകരിക്കുന്ന മൗനം സൂചിപ്പിക്കുന്നത് കുഞ്ഞനന്തന്‍ താമസിയാതെ പുറത്തുവരാനിടയുണ്ടെന്നാണ്. സര്‍ക്കാര്‍ നീക്കത്തെ പ്രതിപക്ഷം നിയമപരമായി നേരിടും'- ചെന്നിത്തല കൂട്ടിച്ചേര്‍ത്തു.

നിയമവിരുദ്ധമായ കാര്യമാണ് സര്‍ക്കാര്‍ ചെയ്യുന്നത്. ടിപി ചന്ദ്രശേഖരന്‍ കേസിലെ പ്രതികളെ രക്ഷിക്കാനുള്ള നീക്കം പ്രതിഷേധാര്‍ഹമാണ്. സര്‍ക്കാരിന്റെയും മുഖ്യമന്ത്രിയുടെയും ഈ നീക്കത്തില്‍ പ്രതിഷേധിച്ചാണ് സഭയില്‍നിന്ന് ഇറങ്ങിപ്പോയതെന്നും രമേശ് ചെന്നിത്തല പറഞ്ഞു.