കണ്ണൂര്‍: സമൂഹത്തെ ധര്‍മബോധത്തിലേക്ക് നയിക്കാന്‍ ഉത്തരവാദിത്വമുള്ള പണ്ഡിത സമൂഹം വളര്‍ന്നു വരേണ്ടത് കാലഘട്ടത്തിന്റെ അനിവാര്യതയാണെന്ന് സമസ്ത ജില്ലാ പ്രസിഡന്റ് പി.കെ.പി അബ്ദുസ്സലാം മുസ്‌ലിയാര്‍. സമസ്ത കേരള ജംഇയ്യത്തുല്‍ ഉലമാ ജില്ലാ കമ്മറ്റി ജില്ലയില്‍ നിന്നും കേരളത്തിനകത്തും പുറത്തും അറബിക് കോളജുകളില്‍ പഠിക്കുന്ന മുതഅല്ലിമുകള്‍ക്ക് നല്‍കി വരുന്ന സമസ്ത സ്‌കോളര്‍ഷിപ്പിന്റെ അവസാനഘട്ട വിതരണോദ്ഘാടനം കണ്ണൂര്‍ ഇസ്‌ലാമിക് സെന്ററില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. പാപ്പിനിശ്ശേരി ജാമിഅ അസ്അദിയ്യ അറബിക് കോളജ്, ജാമിഅ ദാറുസ്സലാം നന്തി, ജാമിഅ നൂരിയ്യ പട്ടിക്കാട്, ശംസുല്‍ ഉലമാ ഇസ്‌ലാമിക് അക്കാദമി കൂത്തുപറമ്പ്, ഖുവ്വത്തുല്‍ ഇസ്‌ലാം തളിപ്പറമ്പ്, ദാറുല്‍ ഹുദാ ചെമ്മാട്, ജാമിഅ ഇര്‍ഫാനിയ്യ ചപ്പാരപ്പടവ്, ദാറുല്‍ ഹസനാത്ത് കണ്ണാടിപ്പറമ്പ്, റഹ്മാനിയ്യ കോളജ് കടമേരി, ജാമിഅ അസ്ഹരിയ്യ പയ്യന്നൂര്‍, വാഫി പി.ജി കാംപസ് കളിക്കാവ് തുടങ്ങിയ ഉന്നത മത കലാലയങ്ങളിലെ വിദ്യാര്‍ഥികള്‍ക്കാണ് സ്‌കോളര്‍ഷിപ്പ് നല്‍കിയത്. സയ്യിദ് എ. ഉമര്‍കോയ തങ്ങള്‍ പ്രാര്‍ഥന നടത്തി. കെ.കെ മുഹമ്മദ് ദാരിമി അരിയില്‍, മുഹമ്മദ് ശരീഫ് ബാഖവി ബ്ലാത്തൂര്‍, അബ്ദുറഹ്മാന്‍ ഹൈത്തമി, അബൂബക്കര്‍ ബാഖവി, യൂസുഫ് ബാഖവി സംബന്ധിച്ചു.