തിരുവനന്തപുരം: പൊതുവിദ്യാലയങ്ങളോടനുബന്ധിച്ച് ഒരുക്കുന്ന സ്മാര്‍ട് ക്ലാസ് റൂമുകള്‍ പരിചയപ്പെടുത്താന്‍ കുട്ടികള്‍ക്കും അധ്യാപകര്‍ക്കും പരിശീലനം നല്‍കുന്നു. അടുത്തമാസം 21 മുതലാണ് പരിശീലനം. ഒരുലക്ഷത്തോളം അധ്യാപകര്‍ക്കും ലിറ്റില്‍ കൈറ്റ്‌സ് ഐ.ടി ക്ലബിന്റെ ഭാഗമായിട്ടുള്ള 50,000 കുട്ടികള്‍ക്കുമാണ് പരിശീലനം നല്‍കുന്നത്.
ഹൈസ്‌കൂള്‍ വിഭാഗത്തിലെ 56,000 അധ്യാപകര്‍ക്കുള്ള ചതുര്‍ദിന പരിശീലനമാണ് ആദ്യം ആരംഭിക്കുക. ഇതിനുശേഷമാണ് ഹയര്‍സെക്കന്‍ഡറി വിഭാഗത്തിലെ 28,000 അധ്യാപകര്‍ക്ക് പരിശീലനം നല്‍കുക. മെയ് ഏഴിനാണ് ഈ പരിശീലന പരിപാടി ആരംഭിക്കുന്നത്.