ഹരിപ്പാട്: ദേശീയ പാതയില്‍ തോട്ടപ്പള്ളി കല്‍പകവാടിക്ക് മുന്‍വശത്ത് നിര്‍ത്തിയിട്ട ലോറിയില്‍ ഇന്നോവ കാര്‍ ഇടിച്ച് ഒരു കുടുംബത്തിലെ മൂന്ന് പേര്‍ മരിച്ചു. കരുനാഗപ്പള്ളി സ്വദേശി ബാബുവിന്റെ കുടുംബമാണ് അപകടത്തില്‍പ്പെട്ടത്. പുലര്‍ച്ചെ ഒരുമണിയോടെയായിരുന്നു സംഭവം.

ഇന്നോവ കാര്‍ ഓടിച്ചിരുന്ന ചെറിയഴീക്കല്‍ ആലുമ്മൂട്ടില്‍ ശ്രീധരന്റെ മകന്‍ ബാബു (48), ബാബുവിന്റെ ഇളയ മകന്‍ അമല്‍ജിത്ത് (16) , മൂത്ത മകന്‍ അഭിജിത്ത് (20) എന്നിവരാണ് മരിച്ചത്. ബാബു സംഭവസ്ഥലത്തു വച്ചും മക്കള്‍ വണ്ടാനം മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെ രാവിലെയുമാണ് മരിച്ചത്. ഗുരുതരമായി പരുക്കേറ്റ ബാബുവിന്റെ ഭാര്യ ലിസി ( 37) വണ്ടാനം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. ഫയര്‍ഫോഴ്‌സ് എത്തി കാര്‍ വെട്ടിപൊളിച്ചാണ് അപകടത്തില്‍പെട്ടവരെ പുറത്തെടുത്തത്