ചെറുതുരുത്തി: കേരള കലാമണ്ഡലത്തിലെ എട്ടാം ക്ലാസിലേക്ക് പ്രവേശനം നേടിയവരുടെ പട്ടിക അംഗീകരിച്ച് ഒപ്പിടാന്‍ രജിസ്ട്രാര്‍ അവധിയായതിനാല്‍ കലാമണ്ഡലം വിദ്യാര്‍ഥികള്‍ ആശങ്കയിലായി.
പ്രവേശനോത്സവം മുടങ്ങിയതോടെ കലാപഠനം സ്വപ്നമാക്കി എത്തിയ വിദ്യാര്‍ഥികളും, രക്ഷിതാക്കളും എന്ത് ചെയ്യണമെന്നറിയാതെ  പ്രതിസന്ധിയിലാണ്. വിവിധ ജില്ലകളില്‍ നിന്നുള്ള നിരവധി കുട്ടികളാണ് പ്രവേശനം നേടിയിരുന്നത്. ഇവരുടെ അഭിരുചി പരീക്ഷയും കൂടി കാഴ്ചയുമെല്ലാം കൃത്യ സമയത്ത് തന്നെ നടക്കുകയും ചെയ്തിരുന്നു.
ഇവരുടെ ലിസ്റ്റ്  തയ്യാറായിട്ടുണ്ടെങ്കിലും ഇതില്‍ ഒപ്പിട്ടു നല്‍കേണ്ട രജിസ്ട്രാര്‍ കഴിഞ്ഞ ആറ് ദിവസമായി അവധിയിലാണ്. മറ്റെല്ലാ സ്ഥലത്തും ആഘോഷ പൂര്‍വം പ്രവേശനോത്സവം നടന്നപ്പോള്‍ കലാണ്ഡലത്തില്‍ നിന്ന് ആഘോഷ മേളമൊക്കെ ഒഴിഞ്ഞ് നിന്നു.
കലാമണ്ഡലത്തിന്റെ ചരിത്രത്തില്‍ ഇന്നു വരെ ഉണ്ടായിട്ടില്ലാത്ത  നാണക്കേടാണ് കലാമണ്ഡലത്തിന് സംഭവിച്ചിട്ടുള്ളതെന്ന് പൂര്‍വ വിദ്യാര്‍ഥികളും സാംസ്‌ക്കാരിക പ്രവര്‍ത്തകരും കുറ്റപ്പെടുത്തുന്നു. പ്രശ്‌നത്തിന് അടിയന്തര പരിഹാരം ഉണ്ടാക്കിയില്ലെങ്കില്‍ പ്രക്ഷോഭത്തിന് തയ്യാറെടുക്കുകയാണ് വിദ്യാര്‍ഥികള്‍.