കാബൂള്‍: അഫ്ഗാനിസ്താനില്‍ കാര്‍ ബോംബ് സ്‌ഫോടനത്തില്‍ 14 പേര്‍ കൊല്ലപ്പെട്ടു. സ്‌ഫോടനത്തില്‍ 40 പേര്‍ക്ക് പരുക്കേല്‍ക്കുകയും ചെയ്തു. ദക്ഷിണ ഹെല്‍മന്തിലെ ലഷ്‌കര്‍ ഗാഹിലാണ് സ്‌ഫോടനം നടന്നത്. സ്‌ഫോടനം നടന്ന ലഷ്‌കര്‍ ഗാഹിനു സമീപമാണ് സ്റ്റേഡിയമുള്ളത്. സ്‌ഫോടനസമയം സ്‌റ്റേഡിയത്ത് റെസ്‌ലിങ് മത്സരം നടക്കുകയായിരുന്നു.

സ്‌ഫോടനത്തില്‍ 14 പേര്‍ മരിക്കുകയും 40 പേര്‍ക്ക് പരുക്കേല്‍ക്കുകയു ചെയ്തതായി ഹെല്‍മന്ത് ഗവര്‍ണര്‍ ഒമര്‍ സ്വാഖ് പറഞ്ഞു. പരുക്കേറ്റവരെ സമീപത്തുള്ള ആശുപത്രിയില്‍ പ്രവേശിപ്പിച്ചതായും അദ്ദേഹം കൂട്ടിച്ചേര്‍ത്തു. പരുക്കേറ്റവരില്‍ നിരവധി പേരുടെ നില ഗുരുതരമാണ്. അതിനാല്‍ മരണസംഖ്യ ഇനിയും വര്‍ധിക്കാനിടയുണ്ടെന്ന് അധികൃതര്‍ അറിയിച്ചു.

ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. ഏതാനും ദിവസം മുന്‍പാണ് കാബൂള്‍ സര്‍വകലാശാലയ്ക്ക് സമീപം മറ്റൊരു സ്‌ഫോടനമുണ്ടായത്. സ്‌ഫോടനത്തില്‍ 29 പേര്‍ കൊല്ലപ്പെടുകയും 52 പേര്‍ക്ക് പരുക്കേല്‍ക്കുകയും ചെയ്തിരുന്നു. ഐ.എസ്.ഐ.എസ് ആയിരുന്നു ആക്രമണത്തിനു പിന്നില്‍.